基爾賓尼談莫爺：佢鼓勵球員以屋企為先 精選

大家記唔記得基爾賓尼呢？打過新特蘭、愛華頓，亦曾經效力侯城，不過點解提到無打過曼聯嘅佢？因為佢同莫爺共事過兩次，仲透露咗佢係點樣嘅一位領隊，聽完費蘭尼、菲臘仔講佢，不如聽下基爾賓尼點講？

普雷斯頓出身嘅基爾賓尼，18歲仔時就同莫爺認識，當時佢係普雷斯頓嘅副教練。而之後過咗幾年，輾轉之下二人於愛華頓就重聚喇！由細見到大，基爾賓尼點睇莫爺呢？佢咁講：「只要季前跟過莫帥訓練，人人都會話係咁多隊入面最難挨嘅。佢知道點樣將球員最好的一面發揮出嚟，而一切就由季前的訓練開始。好簡單，對上一季曼聯第一場比賽對愛華頓就食到苦果，以1-0的比數輸波，大家都見到愛華頓根本完全唔似開季第一場波。球員嘅準備非常充分，你就知莫帥係點教波嘅。而且你喺邊都見得到佢，早上佢會同大家一齊熱身、一齊做訓練；而佢會出沒嘅地方包括gym room、訓練場，只要有球員需要佢，佢都會出現。」
而且基爾賓尼都見過莫帥作為球員的身影，因為當年普雷斯頓副教練莫耶斯原來係半職員半球員身份：「佢係一個好嚇人嘅中堅，制空力好強。在普雷斯頓時佢做過隊長，之後又係半教練半球員，場場波都上陣，好努力，佢對我的影響好大，事業同生活都係。佢會邀請我去佢屋企食飯，佢老婆都好客氣。呢個習慣帶到嚟今日，每隔幾個月佢就會邀請球員一家人食飯，老婆仔女人人都獲邀，因為佢知道足球係一個好自私的運動，球員成日唔喺屋企，好容易就會忽略咗屋企人。所以佢會帶頭幫球員維持同屋企嘅連繫。」
「我無驚訝佢接任爵爺，因為佢好啱教曼聯。以前爵爺一定係當家做主的人，不過莫帥一到埗就開始建立自己的威信，話俾全隊知，依家當家嘅係佢，唔再係爵爺。呢一步好聰明，亦好有效。」筆者反而最佩服佢想球員留意多啲屋企人，呢個「有家才有國」的諗法真係好溫暖！