萬人迷何去何從？拍戲、開餐廳定做美職聯老闆？？

萬人迷碧咸掛靴之後去邊？教波？定係做小男人留家教仔？佢點會咁無大志！雖然大家已經無咩機會喺綠茵場上見到佢，不過可能喺第二啲地方，例如係佢開嘅餐廳、美職聯的VIP房，甚至係電影銀幕！

《太陽報》就話，碧咸正密謀同名廚詹姆斯藍斯(Gordon James Ramsay)合作，一齊喺美國拉斯維加斯合資開一間頂級餐廳。詹姆斯藍斯係咩人？佢係英國的頂尖廚神，曾參與不少名人烹飪電視節目，以親自主持的《地獄廚房 (Hell's Kitchen)》聞名於世，被媒體稱為「地獄廚師」！據稱碧咸同佢有好好嘅交情，而二人合作將有好大的協同效應：藍斯想在世界最豪華的地方開鋪；而碧咸就最適合做全世界最豪華餐廳的華麗合伙人！
不過路透社就有另一個諗法，話碧咸去咗美國邁阿密，同美職聯高層進行會面，因為碧咸想做美職聯其中一隊嘅老闆！之前美職有一隊紐約城New York City FC，碧咸原本想做老闆，不過最後被曼城以以1億美元橫刀奪愛！不過碧咸係唔會咁易言敗嘅，據消息因為考慮到佢過去為推廣美職聯做出的巨大貢獻，美職聯高層甚至願意以低於市價向佢出售特許經營權添！

不過大家最想睇到嘅，係唔係佢開拍電影呢？咸爺同「靚湯」湯告魯斯係好朋友大家都知，早在《職業特工隊4》的首映時湯告魯斯就話過好想叫碧咸一齊拍電影：「我想同佢一齊拍動作電影！佢好出色，而且有一個角色好啱佢做，就係踢人pat pat！佢一定可以在電影中做一個成功的大反派！」而《每日星報》都話咸爺一直想拍動作電影，而靚湯一早就應承咗佢！所以大家都諗緊《職業特工隊5》好可能就係咸爺的處女作！如果係咁，真係唔駛賣廣告都場場爆滿啦！