ESPN消息：莫帥目標第一簽-----法比加斯！ 精選

曼聯由賽季完結後就盛傳會買入一位大牌球星，當好多粉絲都期待緊係唔係c朗嘅時候，竟然殺出一個程咬金：法比加斯！根據ESPN的內幕消息，有曼聯消息人士指紅魔已經派人同巴塞接洽，希望可以購入法比加斯及A泰亞高！

曼聯的購物單入面，當然有費蘭尼份啦，不過佢同A泰亞高之上，曼聯更想買到的是前阿仙奴的靈魂人物法比加斯。據ESPN的消息，雖然就個人而言A泰亞高較為想加盟曼聯，不過巴塞看似會拒絕其1800萬英鎊的出價。所以就球會而言，反而法比加斯的轉會可能更有機會。外間都未知法比加斯是否想離開魯營，不過曼聯就希望以2500萬鎊的資金引入呢位中場大腦。而莫耶斯好明顯會將曼聯中場指揮官的位置俾咗法比仔，而呢個係一個非常吸引的條件，因為在巴塞暫時都係由沙維主宰呢個位置，法比仔即使好想做中場指揮官亦苦無出頭機會。

同時，消息亦指曼聯將會有三位中場大將離隊，史高斯的掛靴不在話下，而安達臣亦傳聞會轉會到一間葡萄牙球會。而講到更實牙實齒的，就係曼聯會將蘭尼以1500萬賣出，而其中最令人驚訝嘅係大熱新東家竟然係阿仙奴！而新前鋒方面，仍然以利雲度夫斯基的呼聲最高，因為多蒙特實在唔想將佢賣去拜仁，雖然羅拔仔的首選依然係今季的歐聯冠軍隊伍。
一齊走呀你哋？？
筆者自己就認為法比仔加盟的機會一啲都唔細，始終有雲佩斯在陣的曼聯，對佢而言有一定的吸引力。不過咁搞法，爵爺同莫爺簡直就係想剝雲加排牙，如果法比仔都去埋曼聯而又可以奪得錦標，昔日喺阿仙奴做唔到嘅今日用同樣的人腳紅魔就做得到，仲唔係話雲加帶得渣？不過呢個都係後話啦，如果過兩日再傳埋曼聯想要埋禾確特，咁就真係大件事喇…
RVP：過嚟啦！有獎攞架！等等，我諗諗...