費蘭尼：「莫爺」嚴到爆！ 精選

跟得官耐當然知道官姓咩啦！莫耶斯的大將費蘭尼已經同莫帥合作了近四年，佢就同大家講莫耶斯真係唔係一般教練，佢好嚴架！同爵爺的風筒比起上來，真係唔知邊個勁啲！

佢咁講：「莫帥係一個好好嘅人，一個好偉大的領隊，不過信我，佢都可以好嚴格！領隊要隊波贏，有時對球員要嚴厲啲先得。足球就係咁，莫帥得人驚嘅時候真係好得人驚！」

爆炸頭對史篤城時曾經對對手梳高斯舉腳過高，因而被直接紅牌出場、再加停賽3場。當時莫帥就俾咗堂費蘭尼：「我記得史篤城嘅比賽入面我被趕出場，之後嗰日佢叫人人都放假，球員放、職員都放，只係剩返兩個人無得放：我同佢！佢捉咗我去加操，成個訓練營地得我同佢，真係好難受…我明，我犯咗錯，不過你會更難受嘅係你知道自己令佢失望，只要一同佢對望你就會好悔疚…我仲好記得加操嗰日，佢俾我嘅任務好艱辛，所有的訓練都好密集，完咗之後我都仲好唔開心，同自己講『呀~~好差勁呀今日！』不過回首前事，我知道佢照顧我、睇好我先咁做，我明白，所以最後其實我都幾高興！」莫爺：睇你仲敢唔敢！
莫耶斯在拖肥糖時一向出名「地獄訓練」，好似菲臘尼維利就透露過，莫耶斯的首本名曲叫「Horseshoe Runs」，只要一做呢個訓練，球員就要不斷衝刺練習體能，一眾「拖肥」練完之後連企都企唔到！菲臘仔咁講：「嗰隻訓練？我真係諗起都驚，完咗之後我要挨住角球旗先企得到，而當年嘅阿迪達甚至瞓低咗起唔返身！」魔鬼教練接手，唔知一眾紅魔頂唔頂得順呢？？