峰迴路轉! 朗尼係被迫走? 精選

費SIR退休，莫耶斯上任，之後睇怕要解決嘅就係朗尼嘅問題喇，費SIR講到明呢個問題留返俾新領隊去解決，之不過今日英國《鏡報》就披露喇，原來朗尼堅決地否認咗佢晌曼聯遞交轉會申請，依家仲好擔心自己被迫離開曼聯。咁究竟邊個係真? 邊個係假?

講返朗尼同費sir嘅關係，兩者之間關係開始冷淡，可以由曼聯歐冠對皇馬次回合，朗尼被放上後備席時開始，又有人話呢一個局面，係由費SIR一手造成，依家朗尼最後兩輛聯賽都不獲上陣，費SIR更表明全因朗尼提出轉會申請所致。而睇朗尼晌冠軍頒獎禮，直班勝利巡遊時，個表情都被人感覺好唔投入，同費SIR關係好疏離，絕對俾人感覺朗尼的確好想離隊!

但英國《鏡報》今日就爆料，朗尼強調佢從來冇提出過轉會申請，而佢本人亦好擔心曼聯球迷不肯再原諒佢，而要佢離隊，雖然除咗PSG外，包括車路士、摩納哥、阿仙奴甚至曼城傳聞都對朗尼有興趣，但現實係除咗PSG外，其他球隊都無咩可能支付起朗尼嘅高薪，而之前更有消息指車路士球迷根本唔歡迎朗尼加盟。

而報導仲話，朗尼其實有想過同曼聯傾新合約，但感覺依家係球隊唔願意。費SIR之前講到明朗尼問題留返俾莫耶斯去解決，之不過報導就指，朗尼最終都係離隊嘅話，個問題全都因為費SIR，因為畢竟作為球隊最高薪同英格蘭頭號前鋒，當然想出場，以及可以打到自己最想打嘅前鋒位置，之不過費SIR要佢出任中場，令佢感覺不受尊重，又要成日被人提前換走，晌踢一個唔擅長同自己唔係好想打嘅位置上，朗尼今季所有數據都下降，而佢亦好明確晌場上顯示出佢好唔開心。

最大問題係，球會表明朗尼想走，如果係真，今次已經係佢三年內第二次提出轉會要求，令好多球迷對佢死心，就算佢依家話自己無提出轉會要求，球迷都可能對佢有負面印象，呢個情況更令朗尼擔心，曼聯咁樣做法係想迫佢離隊。
來季朗尼會著咩誘件波衫呀?

小分析：有外國傳媒分析，其實由費SIR開始講朗劬想走，呢件事感覺上好似無得返轉頭咁，事關曼聯一向都唔鐘意將內部問題呈現晌傳媒身上，費SIR咁坦白向傳媒講，感覺上佢好似已經放棄朗尼，加上佢幾年前已轉會威脅加薪，費SIR一早對呢件事懷恨在心，晌今季雲佩斯可以完全代替朗尼嘅入球能力下，放走朗尼不失為過，亦可減輕佢合約薪金嘅支出。所以佢哋表明，如果朗尼想留隊，隨著進步空間開始減低，續約時必須減薪，如果唔係只好離隊他投。