西布朗 對 曼聯 賽後語：爵爺只留下三個字… 精選

爵爺的最後一場比賽，曼聯與西布朗球員可能想俾個好回憶爵爺，竟然當係表演賽咁打，最後比數非常瘋狂，可以與曼聯打成5-5的比數真係無咩邊幾隊波可以做得到(甚至，英超史上5-5都係第一次！)不過呢場比賽過後，爵爺只係高舉雙手、深鞠一躬對球迷致意，連記者會、甚至官方電視MUTV的訪問都無出席，只係離開賽場時留下三個英文字：「Emotional, very emotional。(令人動容。非常令人動容。)」爵爺咩都唔講，實在令筆者非常唔習慣…不過呢個方式，亦顯示出爵爺的堅決，決定完全離開執教曼聯的生涯，因為只有咁樣，對新的曼聯、對莫耶斯的執教才是最好的…
當然，爵爺唔出聲，其他人都有嘢講嘅！賽後，卡域克就咁講：「情況好微妙，更衣室入面的氣氛好有趣…大家都開始消化爵爺退休的決定，我哋始終都要啲時間先接受到。我哋已經準備好繼續行落去，新挑戰已經在眼前，我哋會好好期待！」

賽後雲佩斯都開下玩笑：「我一直以為會有『費格遜時間』出現，不過原來呢個係都市傳說！都無嘅！不過話又講返轉頭，一場波可以有10個入波出現，對大家而言都有特別意義，最少對球迷而言非常精彩、好睇！下個球季我哋有新主帥，成隊人都好期待，因為係一個新挑戰。等我哋放返個暑假，好好休息下，之後我哋就會繼續為曼聯征戰！」

西布朗領隊奇勒都為爵爺送上祝福：「佢一定會記得呢場比賽，今日每一個在場的人都會記得！我覺得呢場波係送俾佢最好嘅禮物。完場之後佢同我講，呢場係一場偉大的比賽，我聽得出佢已經準備好退休了。」

賽前當地球迷送咗一件特別訂製嘅西布朗波衫俾爵爺，號碼係1500，代表爵爺執教曼聯第1500場比賽，印名…Sir Alex！完場之後，就連球證都排隊向佢攞簽名！到咗呢一刻，曼聯一代領隊費格遜正式退休喇…曼聯的王朝會點？就要睇新嘅領隊莫耶斯喇…

鍾斯又囧.....=.=