碧咸球員生涯最後一個訪問：是夜百感交集!!! 精選

38歲嘅碧咸晌周四宣佈今季季尾退役，其後噚日就係佢晌宣佈退役後嘅第一戰，代表PSG主場對戰比斯特，係球隊本季最後一場主場賽事，而PSG亦特地戴上隊長臂章，正選出戰。雖然PSG之後仲有一場作客羅連安特嘅比賽，而估計碧咸晌嗰場波唔會上陣，所以今場主場之戰，可以話係「咸爺」球員生涯最後一戰，而晌主場完結自己足球生涯，亦令氣氛推上最高峰!

碧咸賽後接受可能係佢最後一次以足球員身份嘅訪問時表示，是夜百感交集，亦表明足球場帶俾佢好多成功感：「可以晌PSG完結自己足球生涯，感覺好特別! 巴黎係世界上一個好靚嘅地方，我好遺憾要離開呢個城市! 經過22年足球生涯後，我諗我會休息幾個月，陪伴我嘅屋企人，及後正如我之前所講，我會留晌巴黎! 我希望繼續成為PSG嘅一份子。」

「今晚的確好特別，我下星期亦會隨隊作客賽事，之不過會唔會有機會上陣，就唔知喇! 不過自己早幾年前跟腱受過傷，下場賽事嘅場地唔係好適合自己比賽。」

其後碧咸對於今場波成為隊長，以及得到在場球迷高呼支持亦好感動，更覺得晌呢個時候作出退休決定好正確：「對於一個英藉球員可以晌PSG出任隊長，感覺好特別，特別晌球隊19年後第一次封王嘅頒獎典禮賽事出任隊長，晌到要特別多謝球會。」

「今場波踢咗20分鐘後，我嘅情緒已好澎湃，情緒嘅嘢好難話抽離就抽離，當睇到我被換出時，在場所有隊友以及球迷的反應，令我嘅眼淚不禁流下。身體狀況話俾我聽，今晚一戰後感覺依然好好，之不過我想晌自己健健康康嘅情況下退落嚟，所以我感覺依家呢個時候做出呢個決定。」

不過對一眾曼迷嚟講，當然係希望碧咸可以返嚟曼聯，出任曼聯大使!

碧咸小檔案：
曼聯(1994-2003)
聯賽：265次上陣，入62球
歐聯：77次上陣，入14球
普雷斯頓(1995)
聯賽：5次上陣，入2球

皇家馬德里(2003-2007)
聯賽：116次上陣，入13球
歐聯：26次上陣，入2球
曾取得4面紅牌

洛杉磯銀河(2007-2012)：
聯賽：115次上陣，入18球
曾取得1面紅牌

AC米蘭(2009-2010)
聯賽：29次上陣，入2球
歐聯：2次上陣，入0球

巴黎聖日耳門(2012-2013)
聯賽：9次上陣，入0球歐聯：2次上陣，入0球
曾取得1面紅牌

英格蘭(1996-2009)
出場115次，入17球，助攻36次