雲加賣個大關子 傳傾雲佩斯轉會時已知爵爺退休！ 精選

自從雲加1996年來到英超開始，就成為咗費格遜最大的敵人。兩隊波在場上打生打死，兩位領隊都喺場邊互噴口水。但隨住年齡嘅增長、骨骼嘅疏鬆，兩位老人家惜英雄重英雄，慢慢由罵戰對手變成好朋友。雲加自己對爵爺嘅退休一啲驚訝都無，令人懷疑佢一早就知道，甚至係傾雲佩斯加盟時已經知道！

佢咁講：「我好耐之前就同我啲同事講過，呢個好可能係費格遜執教曼聯的最後一季喇。望住佢，我發現咗好多跡像，甚至在賽季開始之前我就已經注意到一啲細節，顯示佢想退落嚟。你聽過話，我同爵爺傾雲佩斯轉會時佢已經話要退休？我不作評論啦！可能遲啲有機會，我再話俾大家知啦。
爵爺：我走喇走喇走喇！雲加：唔理你。
佢退休真係令人好唔開心，因為呢個一定係一個時代的終結。不過你必須尊重佢嘅決定。而且佢好彩過我好多啦！又鍾意跑馬、又鍾意高爾夫、又鍾意飲紅酒，佢退休一定退得好開心！咁多嘢可以玩！不過我又不得不承認，在球壇工作咗咁耐，我同佢都好期待有比賽嘅時候，你會對比賽充滿動力！我認為啱啱退休嘅佢好難放得低，要慢慢嚟。教足26年半噃！點都要啲時間。

最近幾年，我哋同曼聯的爭奪已經唔再激烈，我同爵爺都相敬如賓咗好多。加上教英超教得耐的教練其實唔多，我哋都好尊重對方。我認為在競爭對手之間從來唔會有推心置腹的交流，在比賽前問候下『你好，最近點呀？』都係客套多。不過我同爵爺唔同，比賽後我會話佢知，我隊發揮幾好，你哋都踢得唔錯，仲會為對方提出建議。我認為咁嘅交流真係好少好少。」
識英雄重英雄，有時真係令人好有感慨！始終英雄好難成日見面，唔似得某啲隊伍咁一有咩風吹草動就炒人，要有爵爺同雲加亦敵亦友的關係真係唔容易呀！所以雲加，你都係多啲約下爵爺去tea 下啦！
爵爺：一陣去邊飲紅酒？雲加：算啦老人家，我同你去hightea 算啦！