曼聯專區小評：C朗會返曼聯四大原因！ 精選

爵爺退咗休，朗尼又叫走，咁對曼聯有咩影響？筆者就講過，曼聯有必要有血性紅魔鎮守先有隊型，最佳人選就係朗尼或者c朗。不過朗尼如果真係走，咁c朗入魔的機會又有幾大？爵爺的離開會唔會令佢唔嚟呢？筆者就有四大理由認為c朗仍然會想入魔！

一：爵爺真的離開了？？
費格遜對c朗恩同再生父母，他的去留對c朗入魔與否當然好重要。要知道，如果2003年唔係爵爺將佢帶嚟奧脫福，佢嘅成就可能無咁大，成長的時間亦要更長。而c朗亦不下一次公開表示自己有幾尊重爵爺。所以爵爺的退休，外間都認為對c朗的決定有影響。不過唔好唔記得，爵爺雖然話唔會垂簾聽政，不過佢仍然係曼聯的大使、每場主場比賽都會在奧脫福vip席、更加唔好講平日食飯、吹水、落訓練場，c朗仍然會成日見到「爸爸」！如果遊子真係思歸，係唔係爵爺領軍又有咩所謂？

二：摩帥真的離開了？？
摩連奴可以話同c朗亦師亦友，c朗對佢都幾馬首是瞻，呢兩位葡萄牙人都有種共同進退的感覺。不過摩帥今季離開皇馬的傳言不絕於耳，就算佢實牙實齒話自己：「我會留喺皇馬，唔full pay都無所謂，我做幾耐嘢就出幾多糧，一個仙都唔會收多。」呢番說話，外國傳媒認為係「威脅」多過「承諾」。就連爵爺，都話車仔同摩帥兩情相悅、舊情復熾。如果今季摩帥真係返史丹福橋，礙於c朗同曼聯的關係，佢一定唔會一齊去車路士。咁皇馬又無咗摩帥喇，去邊好？返奧脫福最好！摩帥：我走喇！好唔捨得呀！c朗：唔好呀！我唔要去車仔呀嗚嗚嗚...唔好呀...

三：引來事業另一個高鋒
打工仔有時都唔係為錢，為成功感、為滿足都好重要。曼聯今年正值大變之秋，爵爺已退、莫耶斯領軍能力未確定；朗尼又隨時走人，紅魔鬼可謂屋漏偏逢連夜雨。如果呢一刻c朗加盟，助曼聯穩定軍心、下屆衛冕，呢個救世主形象將永不磨滅。所以作為心高氣傲的c朗，呢個係表現自己、名留青史的好機會！
四：大阿哥出現！
正如筆者所講，c朗係紅魔的頭號人物，只有傑斯、里奧等人先可以挑戰其地位；但佢哋都已經有退居幕後的準備。相比而言，香川、卡華利、安達臣、楊格，甚至蘭尼都係佢嘅後輩，大阿哥之位一定非c朗莫屬。相對於在皇馬球星眾多，c朗在曼聯更加可以做領軍的角色，這是他未曾試過的。挑戰自己係佢嘅大目標，呢個一定都係誘因之一。
講到呢到，已經俾到好足夠原因c朗返曼聯，加上大衛基爾自己都出手到西班牙傾，呢種誠意同機會唔係成日可以有。所以筆者預計，成件事最大的障礙只係皇馬想唔想賣c朗，如果呢關一過，曼聯同c朗都係意投意合嘅。作為球迷，筆者自然都好想佢返，令曼聯多一支定海神針，穩定爵爺退休的餘波啦！
c朗：女朋友仔，返英國好唔好？點話點好啦！