韋碧克入波數大跌 爵爺自責 精選

韋碧克入波數大跌？大家無睇錯，原來上季佢係朗尼之後最多入波嘅球員！上季計哂全部比賽，韋碧克共入12球，同小豆入波數字一樣！之後先係蘭尼嘅10球！當然，唔可以同34球嘅朗尼比啦，不過佢曾經同小豆有住一樣嘅威脅性！

不過今季就真係麻麻地，至今入咗…2球，就連艾夫拿、伊雲斯、拉菲爾都入得多過佢。歸根疚底，爵爺就話自己都有責任：「上年佢好多波入架，12球！今年得2球，真係跌得好勁，不過呢個情況我哋唔會放喺心上，因為佢仲係做得好好，好有入波的意欲。我諗佢需要一個契機，俾到佢勇氣入波，咁佢就可以變成好穩定嘅入球製造者。
佢今季情況咁差，可能因為我成日將佢調來調去，打下翼又打下輔鋒咁，令佢好唔慣啦！佢太年輕喇，成日轉位可能影響到佢，我轉得佢太多喇，轉到佢暈暈哋…不過佢仍然係球會的重大資產，因為我放得佢打咁多個位，即係佢個個位都勝任到，打得好。我諗佢再成熟啲、入波數字穩定啲，我就會將佢移入中間打正前鋒架喇。」
其實呢…筆者唔係唔鍾意韋碧克，不過佢保護皮球嘅能力實在係太好，加上速度又唔係好快，射門又唔係好準…勤力係好夠，不過能力就真係要「練過先好嚟」喇…不過爵爺對佢真係好信任，咁我哋都惟有確信爵爺的眼光啦…