雲佩斯又破球會紀錄！超雲佬、丹尼士羅！ 精選

雲佩斯破咗咩紀錄呢？原來係加入曼聯的第一季中，在聯賽入波最多紀錄！之前紀錄保持者為曼聯80年代的主將、蘇格蘭人麥佳亞（Brian McClair），該射手在87至88年球季由些路迪加盟，在40場聯賽中悉數上陣，共攻入24球。第二位的，是雲佬及丹尼士羅（Denis Law），雲佬雲尼斯達萊上陣29場，3次後備上陣共攻入23球；丹尼士羅則上陣38場攻入23球。
麥佳亞好可愛嘅老人家丹尼士羅！中間的大家都識，咁右手邊呢？又係橙色，又係雲佬！

而雲佩斯，在過去的32場比賽中後備上陣3次，共攻入25球，已經超越了之前所有的紅魔！不過呢個數據只限聯賽，如果計埋其他比賽的入波，雲佬仍然比新雲佬更有效率，因為雲尼斯達萊全部比賽中共攻入36球！雲師兄至今有29球，要超越埋雲尼斯達萊，就要餘下3場比賽入8球先得！就算係雲佩斯，呢個數字都真係有啲難，係唔係？
然而只睇數字係無咩意思嘅，睇嘅係數字背後的意義。打破曼聯球員首季入波數字紀錄，意味住雲佩斯極速融入球隊，已經成為曼聯的一份子。當中，功不可沒的當然係佢嘅好拍檔朗尼啦，交出10個助攻的朗尼係英超第二位，只比馬達交出12個助攻少2個，而艾夫拿、卡域克、華倫西亞、韋碧克等人都有4到5個助攻，可見曼聯的整體性實在令人驚訝。筆者其實都幾驚朗尼會離隊，佢嘅雄心好似已經無以前咁旺，不過睇數字上佢助攻仍然多、入波仍然多，而且同雲佩斯的化學作用好大，希望爵爺可以格外開恩，等朗尼轉型唔好賣佢啦！
RVP：我睇你都幾危 朗尼：多事！