曼聯專區睇打比遊記Part 1：殺入奧脫福！ 精選

曼聯專區嘅編輯好榮幸得到去奧脫福睇波嘅波飛，仲要係4月8日曼市打比戰嘅票，當然要去感受一下當地嘅氣氛啦！當然，山長水又遠去英國唔會淨係睇曼聯嘅！借呢個機會，編輯都去咗倫敦造訪唔同球會，實行嚟一次英超遊記！喺呢到做啲啲預告先，曼聯專區將會有一連三篇嘅英格蘭睇波紀行，呢一篇係首篇「曼聯專區睇打比遊記」！之後仲有架！大家記得睇喇！

講返呢次睇曼市打比先，要去朝聖，筆者真係好緊張！加上呢一場係同城打比，當然要早啲去踩下線、睇下場啦！不過點先去到奧脫福呢？呢個就要先講講曼市的結構，大火車站Piccadilly Station處於曼市市中心，佢嘅東面就係曼城主場City of Manchester Stadium，搭火車由倫敦去曼市已經可以見到。
而奧脫福，就係位於市中心嘅西面，需要乘不同的交通工具去架！而去嘅方法就有兩種！就係搭巴士同電車metrolink喇！
紅圈：奧脫福 藍圈：曼城 黑圈：曼城市中心
先講下巴士啦，筆者就搭當地250號巴士去奧脫福嘅！呢條巴士線由市中心Piccadilly Gardens去到大商場The Trafford Centre，奧脫福就位於巴士線嘅中間，不過唔怕搭過龍，因為奧脫福太大喇！見到佢就撳制落車，實無死啦！
至於metrolink，就係曼市自己嘅電車系統，可以去哂市內重要嘅地方，Old Trafford筆者唔多介紹，如果去City of Manchester Stadium，就要去到Etihad Campus站落車，旁邊就係喇。呢架就係metrolink喇！去曼城，就要呢到落車！
不過要留意，睇完波7萬個人一齊走真係好大件事，所以metrolink會有臨時嘅人流管制添。有啲波飛仲包埋電車飛架，要留意！好喇，終於到夢劇場喇！一入去就有大大個牌歡迎大家啦！
喺球場的通道，仲有好多大banner寫住咁多年來奧脫福的歷史！要攞飛？當然就要去呢到啦！
仲有好多表格可以攞！
出到嚟，少不免要睇睇唔同嘅銅像！佢係邊個？咪就係偉大嘅畢士比囉！仲有三大頭！由左至右就係貝斯、丹尼士羅，仲有查爾頓！

不過大家都應該留意到，個天仲好光，因為仲係下午12:00！有排都未入場，去邊好？當然係去...博物館啦！不過呢part大家要等一下喇！好快就俾大家睇！

最後俾多個旅遊tips大家，如果大家係由倫敦搭火車去曼城，可以上網睇定買定火車飛，咁就可以揀最平的火車票！唔好睇少，貴嘅火車飛成220鎊一張，即係2600港元！筆者自己就買咗26鎊一張而已，06:55上車，早就早啲，不過慳得一蚊得一蚊嘛！XD Virgin trains 係一個幾好嘅網上訂飛網頁，標榜不收額外charge、名碼實價！睇嘅時候記得睇埋邊個站上車、邊個站落車，因為曼城自己已經有幾個火車站，好似大站Piccadilly Station，仲有Oxford Road Station、Manchester Victoria Station，去邊就要睇下自己需要喇！