爵爺：我有一個估唔到，同一個後悔 精選

咁神秘？其實爵爺估唔到嘅嘢，大家應該都有同感，就係估唔到可以有15分的優勢！爵爺咁講：「呢幾年英超好唔同，曼城的掘起固然好令人驚訝，不過仲有好多強大的隊伍都爭奪緊頭幾位，好似車路士、阿仙奴、熱刺都好有威脅。所以我原本期待一個好緊湊嘅賽季，一分一分都咬住；而我亦按住呢個諗法，希望加強隊伍的入球能力，唔好再輸得失球差。點知到今日竟然有15分的距離，我真係發夢都諗唔到。今季得到96分我會好高興，因為呢個分同奪冠幾乎畫上等號。」
阿仙奴其實真係有能力爭頭4位呢位大聖爺更加令熱刺成為「大鬧英超」的主角！

曼聯雖然呢兩星期無比賽，不過一眾將士都有出戰國際賽，爵爺就話會好好咁計下每個隊員的出擊時間，再諗下星期六對黑貓時出咩陣、出咩人，因為到呢一刻，多一分就代表近冠軍多一步；只要餘下的9場比賽攞多13分，紅魔就鐵定可以拎冠軍返屋企！快啲攞多13分！

不過爵爺口中的「一個後悔」又係咩？原來係話當年，1988年嘅時候佢買唔到一位球員，爵爺後悔嘅係無論曼聯的未來同呢位球員嘅未來都可能會唔同哂！佢係邊個？就係加斯居尼囉！佢咁講：「原本我可以在紐卡素手上得到加斯居尼，不過佢最後去咗熱刺。佢真係一個好強大嘅足球員，係卜比sir之後最偉大嘅英國球員之一。我成日都講，當年佢決定去熱刺唔成魔係一個大錯，佢一定好後悔。」

加斯居尼唔單止出名球技了得，更出名嘅係佢嘅私生活唔檢點，酗酒的問題更加係佢嘅標籤；最近甚至嚴重到醫護人員以為佢會因為飲酒而死，送咗佢入醫院…爵爺有教囝嘅龐大經驗，如果加斯居尼當年真係成魔，可能會俾爵爺教好唔再飲酒，足球的成就可能更大！不過點都好，最後佢都無成為曼聯球員，不過都希望呢位名宿可以快啲打低「酒癮」重新生活啦！
一代名將加斯居尼！