迪基亞：加盟曼聯令我變得成熟 精選

2011年6月以2000萬鎊加盟曼聯嘅迪基亞，晌成為紅魔一份子後，因背住喺雲達沙接班人之名而受到大眾注視，加盟初期壓力甚大，經常被認為晌接應高空波攻擊方面失去信心，表現更多次令人失望，更被連迪加特搶得正選位置，但今年表現明顯有改善，晌對皇馬首回合聯聯賽事一役打出身價波，用腳擋出基迪拉必入埋門，令人留下深刻印象。而迪基亞近日接受訪問時表示，加盟曼聯後令自己變得更成熟。

呢名22歲球員就講喇，「晌加盟曼聯之後，我改變咗好多! 我用咗兩年時間去學習英國足球文化，從而令自己有改變。依家嘅我變得更成熟，同剛剛嚟到英國嘅我好唔同。」

西班牙將會今個國際賽賽期對戰芬蘭和法國，而迪基亞亦有入選，佢更認為今次入選喺佢職業生涯踏出一大步：「能夠入選西班牙國家隊，我好開心，呢一刻絕對令我職業生涯踏出一大步，我必定會盡我所能，做得最好! 我會向我嘅隊友好好學習，就算我是因為隊長卡斯拿斯受傷而入選，我都會好好享受為國家隊出戰嘅時光。」

至於講到西班牙將會對戰法國，到時佢會同隊友艾夫拿見面，佢就講喇，「我曾經同艾夫拿講過，佢同我講法國一定會贏波，但西班牙必定會反抗對底，爭取勝利。」