皇馬魔咒？？歷史上首回合1-1情況下未曾試過晉級！(附皇馬 對 曼聯 賽後語) 精選

看到下面嘅數據，不少紅魔球迷肯定會好開心：在歐聯兩回合淘汰賽歷史上，皇馬之前試過4次首回合主場取得1-1，但無一例外的全部出局、堪稱百發百中！兆頭當然唔好，而下回合返到奧脫福球場亦一定係硬仗，皇馬將會打得更艱難。而摩連奴自己亦唔係擅長反勝，數據顯示狂人10年的執教生涯中，唯獨得一次可以主場1-1時，次回合仍能晉級(2006-07賽季歐聯半決賽車路士VS華倫西亞，主場1-1和，作客2-1勝)。
截住佢...唔係，係截住成隊皇馬！
1-1的比分對作客隊伍而言絕對是不錯的成績，一個作客入波的優勢能讓曼聯在下場佔據主動位置。事實上歐聯歷史中，球隊主場首回合只取得1-1嘅成績仍可以晉級嘅概率不足3成。具體而言，歐聯歷史上主隊首回合1-1的情況出現過685次，但最終取得晉級資格的只有174次，只得25%晉級概率。不過睇數據都係次要，贏唔贏都要睇心理質數！睇嚟曼聯一眾球員和波之後好似食咗定心丸咁噃：

卡域克：「c朗入波唔慶祝好值得尊重，佢表現出對球會、球迷的尊重。佢著起曼聯波衫時有過美好時光，佢咁識做真係要俾個like佢。佢入嗰球真係我哋犯錯在先，失個咁波唔係一件好事：太簡單嘅攻勢，一個斬波、一個頭鎚。不過我哋好快重整軍容，令整場比賽我哋都佔優啲啲。」c朗跳得咁高...有新聞話佢跳得高過NBA選手！點守呀？

鍾斯：「c朗真係好強，佢創造機會嘅能力好強大。不過呢場佢無咩機會，因為我哋一早計劃好點限制佢。返到奧脫福都會一樣，我哋會封鎖佢嘅創造力。」

傑斯就讚入波功臣韋碧克噃！「佢(韋碧克)成晚都表現好好，為皇馬製造一切可能嘅麻煩。佢值得入波。而1-1都係一個好結果，攻入一球固然開心，不過防守得好亦係令人振奮嘅。不過換我入場其實都幾驚喜，我好開心！我同自己講，既然感覺良好，就要打多啲歐聯先得！」無他嘅，39歲對住皇馬仲可以先飛鏟搶到波、再爆一段落底線，難怪你咁享受嘅！
不過爵爺完場之後，就要不斷say sorry，因為：「我令好多紅魔失望，因為11個人都唔知點揀好。我要安撫小豆，同佢解釋雲佩斯係我哋嘅首席射手，一定要有人在後備席支援佢，而小豆就係最佳人選…佢已經入夠14球，今季一定有20球進賬！我惟有咁去解釋…不過對住楊格同蘭尼，我真係唔知點解釋好…佢哋都係有能力嘅球員，不過總唔可以擺哂喺場上，11個人叫我點揀？總要有人後備…」
而摩連奴就怪責拉莫斯防守韋碧克不足引致輸一個入波：「你睇返帶就知發生咩事，我哋早早就睇哂曼聯的比賽，知道曼聯死球時的強弱，好好咁做組織、分派咗每人嘅工作，而拉莫斯就係走甩咗韋碧甩。當你輸咗同對手的爭奪，做咩準備功夫都無用。我預計佢哋主場時，會在支持者面前採進攻姿態，咁我哋就有機可乘。」

下場主場對皇馬嘅比賽將會在3月5號，一決雌雄時曼聯專區會同大家一齊睇波！到時就知呢個皇馬魔咒係真唔係喇！
香川：喂，換波衫喇，起身啦！