費SIR:小豆又令我陷入兩難

曼聯專區 於 29/01/2013 發表 收藏文章
曼聯主場對富咸足總盃第四圈賽事大勝4:1,當中小豆個人梅開二度,令佢夾夾埋埋已經晌今季射入咗14球(聯賽8球、盃賽6球) ,超越咗朗尼,成為計雲佩斯之後嘅球隊二號射手,小豆今次出場都有表現,難怪連費SIR都話小豆嘅入球效率,令佢晌選擇前鋒排陣時陷入「兩難局面」。
對富咸一役有波入,小豆慶祝時跳起舞嚟...


唔講唔知,根據OPTA統計,原來小豆係今季英超最高效率嘅的射手,晌聯賽賽事入面射過27腳入8球,平均每74.6分鐘就入到一球,超越排第二嘅迪斯高同第三位嘅隊友雲佩斯。其實就係呢啲數據,加埋佢晌場上拚搏,永遠唔放棄嘅精神,當然令到一大眾紅魔迷支持佢,要度小豆任正選嘅呼聲仲越來越高添…
小豆只要晌場上亮相,永遠唔會令球隊失望,,,


大家都留意到呢個情況喇,更何況費SIR呢? 佢日前就坦白承認小豆嘅入球效率,令佢晌揀人正選時有「兩難局面」:「小豆今個夏天無代表墨西哥出戰比賽得到休息,令佢受益不少。佢咁好狀態,令到我揀前鋒出場時陷入兩難境地,有時為咗俾雲佩斯出場,我不得不把小豆放晌後備席上,但我已經同佢解釋清楚呢個情況,球隊其實好睇重他。佢係一個出色嘅職業球員,比賽態度永遠都咁投入,晌場上又不停跑動,竟連每一次嘅訓練課都係一樣,所以我對佢表現感到非常高興。」
兩位前鋒令費SIR難以決擇...


講到前鋒,至於另一前鋒朗尼亦都連續兩場足總盃賽事有波入,佢晌足總盃入球數字已經去到16球,合共更累積咗191球,晌曼聯歷史上排名第4。日前晌歷嚟入球榜排第二嘅丹尼士羅(237球)就睇好朗尼會破佢入球紀錄,贏取佢首個足總盃冠軍:「有啲球員晌禁區入面嘅時侯,你唔會覺得佢可以入波,但朗尼從來都唔係,只要佢晌禁區入面,佢入波嘅機會就非常大。紀錄被打破係好正常嘅,所以朗尼日後會打破我嘅紀錄係無可避免。佢加盟曼聯時我都講過,如果能夠避免嚴重傷病嘅話,他絕對有能力成為曼聯歷史頭號射手。」
睇好朗尼破紀錄嘅,肯定唔止係名宿丹尼士羅...

留言


請按此登錄後留言。未成為會員? 立即註冊
    快捷鍵:←
    快捷鍵:→