小豆：我要贏三冠王！ 精選

小豆靴南迪斯自加盟之後一直人氣高企，態度正面、形象健康都令佢有一班長期粉絲。不過為人正面唔代表無野心，FA Cup入富咸兩球之後，小豆就宣言今季要向三冠王努力！

佢咁講：「人人都知道我哋想贏FA Cup、歐聯同英超。唔覺唔覺都成十年未贏過FA Cup喇，球員人腳都齊，不過就係無攞過，大家都好想贏。爺爺啦(應該係指爵爺)、隊友們啦，甚至我自己，都好想可以捧呢隻盃返屋企。所以可以入4粒晉級，大家都好高興！我自己就好想贏三冠王，我哋成隊人都無時無刻記住。當然啦，想三冠係一回事，我哋備戰的心態係逐場計，會為每一場比賽盡全力，聯賽場場攞3分固然重要，歐聯、FA Cup晉級都要盡力。」
對上一次...真係好耐喇！

爵爺都為小豆護航噃：「老問題喇，要揀人出戰真係好困難，為咗要出雲佩斯，我惟有放棄唔俾小豆正選…不過我哋對佢好大期望，佢唔單止非常專業，仲有無可媲美嘅正面態度，上到場無時無刻都跑動緊，就算訓練時都唔會抽水偷懶！」大家應該都好明白爵爺嘅問題，朗尼、雲佩斯的組合實在太吸引！韋碧克都仲可以打下邊，小豆就真係好難可以同2大英超前鋒爭位嘅…所以有盃賽都係好事，小豆可以打住先、攞下經驗，日後朗尼打攻中打順咗，就可以拍住雲佩斯打前面啦！小豆：爵爺話有你無我噃！