韋根對曼聯賽後語：團結、合作是曼聯最大的武器 精選

團結、合作是曼聯最大的武器，呢句唔係筆者講嘅，亦唔係爵爺講，而係紅魔隊中舉足輕重的兩個人、無夾過、異口同聲一齊講！

第一個講嘅係長青樹傑斯：「隊中人人都好團結好有teamwork，入波好似11個人一齊入咁，防守亦係11個人一齊防。呢個高度合作嘅團隊令韋根嘅機會減少好多。小豆同雲佩斯打得好好，唔單止攻擊上，防守上都出好多力，前場已經力逼對手、製造混亂，變相令中場球員多咗空間，可以施加更多嘅威脅。」
而雲佩斯亦讚隊友：「呢隊波好特別，人人都好想幫隊友、個個都想助攻多過入波。後衛會為中場不惜氣力補位、中場又會為前鋒付出一切。結果就係人人都全場搏命跑、助攻助守，不過人人都有只得一個目標，就係為球隊努力。
我都好滿意自己嘅入波，特別係小豆傳俾我嘅嗰球。我只係掂到個波三次，不過次次都到位準確。小豆傳俾我時，我走快咗半步，所以第一腳掂波係修正個波去左腳控制好。然後我等對方防守球員鏟到就腳交右腳，呢個係第二次掂波。最後，當然就係起腳射門！我好滿意呢腳右腳入波！」
不過呢隊波唔單止合作得好，更難得係人數唔止11人，計埋後備都一樣同心同德、而且輪換之下默契依然好好。韋根領隊馬天尼斯就點出咗呢個強勢：「你要祝賀曼聯，因為計人腳我哋真係無辦法應付11日4場波咁大嘅負擔。紅魔有咁嘅空間可以做好豪侈嘅輪換，加上小豆同雲佩斯發出的光芒越來越強，最後就令比賽變得好懸殊。」佢真係有佢嘅道理，好似維迪就無傷無病不過睇足全場唔駛上陣，就見到曼聯的板凳深度足以應該幾條戰線，對之後歐聯及其他盃賽好有幫助。你點睇曼聯球員的合作無間呢？
馬天尼斯真係唔好彩...