英超「聖誕快車」展開 曼聯紀錄上成聖誕賽程搶分王! 精選

英超「聖誕快車」賽程即將展開喇! 曼聯晌快車期間要對嘅對手包括史雲斯、紐卡素、西布朗同埋韋根…就咁睇最大機會失分係史雲斯場波之外，其他三場實力上應該都可以應付，不過咁短時間內打咁多場波，失分機會都有少少，之不過睇番數據，曼聯原來係聖誕賽程搶分王!

睇番近5年各隊晌英超「聖誕快車」賽程嘅成績，曼聯係咁多隊入面排第一! 25場比賽入面，紅魔贏到19場和2場輸4場，平均每場攞到2.36分，至於排第二嘅係阿仙奴，平均攞到2.11分，而曼城同熱刺就以相同嘅1.77分，排晌第3、第4位。

另外，唔計今季，原來曼聯攻力上晌呢段期間，亦係咁多隊入面入得最多波! 雖然佢哋打得25場波，但合共攻入咗55球，平均差唔多成每場2球以上，今季有埋雲佩斯在陣，睇怕入球數字只會有更多。

仲有個有趣數據就係曼聯晌「拆禮物日」嘅比賽戰績係特別好，曼聯晌過去20年只係輸過1場「拆禮物日」嘅比賽，共餘19場紀錄則係17勝2和，同時曼聯已經連贏咗8年26號嘅賽事。至於今年曼聯「拆禮物日」嘅對手就係紐卡素，紐卡素過去9場只係贏過1場，就咁睇數據曼聯贏晒，再加上嗰場波晌奧脫福出戰，睇怕為紅魔加強咗唔少信心!!!
晌呢段時間，曼聯應該會有香川真司晌後段復出，加上維迪亦可侯命，到時兵源更充足，絕對有利曼聯搶分，繼續成為「搶分王」!!!
期待香川復出...