萬人迷發離開銀河宣言！ 精選

最近除咗c朗話想走，就連萬人迷碧咸都發出正式宣言：「我離開銀河喇！」碧咸表示，12月1日美國職業足球大聯盟盃將會係佢最後一場為銀河上陣嘅比賽，之後就會離開一班好隊友喇！

「可以成為銀河球員係好好嘅經歷，而且我嘅離開唔代表我同美職聯嘅關係完全斷絕，因為我仲好有野心，希望未來可以加入管理層同成為球會擁有人之一。不過喺我職業生涯完結之前，仲有最後一個挑戰等我完成！
我好高興見到鍾意美職聯的人越來越多，發展越來越好。而美國呢幾年我好開心，唔單止擁有越來越多銀河嘅粉絲，亦有好多美國粉絲，尤其你見到呢個國家嘅足球潛力無限大，你可以為拓展佢而出一分力係非常令人振奮！」

大家應該都留意到，碧咸有提到「職業生涯中最後一個挑戰」，究竟係咩呢？有澳洲報紙就講，澳職聯有5個球會對佢有興趣；而巴黎聖日耳門亦在今夏傳過有意買萬人迷。所以筆者認為碧咸應該唔會返英超喇…萬人迷一家人住慣住熟美國，睇嚟要再適應歐洲生活應該有啲困難，唔通真係去打澳職？定係爆個大冷，佢竟然去咗中超呢…？呢個謎，睇嚟好快就可以解開！