里奧：足球唔係講錢呀!!! 精選

當年以29M轉投曼聯嘅里奧，一直以嚟大家都應該知佢晌曼聯份約非常豐厚，有報導指佢平均每年可到賺到600萬，係其中一位排晌富裕榜嘅球員之一，但佢日前就同大家講講佢嘅足球理念，表明「足球唔係講錢呀!!!」
里奧打波經常充滿熱誠...

晌里奧效力曼聯期間，佢一並帶領曼聯贏過一次歐聯冠軍，亦贏過5次聯賽冠軍，佢就話喇，「好多人講足球都係講錢，以金錢圍繞成個球壇，但對我嚟講，足球係講點樣去勝利。因為當你日後足球生涯完結後，令你感到自豪嘅將會係你嘅成就，係你晌職業生涯入面贏過咩獎，而唔係講金錢。」

「足球最重要嘅唔係錢，大家足球員之間唔係講大家有幾多錢，較重要係講講場波，尤其係輸咗一啲應該要贏嘅比賽，大家需要討論一下點解要輸，從而點樣下一場做得更好，晌曼聯，贏得錦標永遠都係每個紅魔嘅首要任務。」
獎項對里奧嚟講係日後講成就嘅指標之一，而冠軍當然亦係曼聯首個目標!!!


繼傑斯同史高斯後，現年34嘅里奧就係紅魔隊中年紀最大嘅一個，里奧相信佢嘅經驗可以幫到一班年青人，「大家都避免唔到你嘅足球生涯會踏入晚年呢一步，日後大家都會成為隊中其中一位老大哥，而隊中年青球員好明顯會好聽你講嘢，不止晌更衣室，甚至晌訓練場都係咁，所以當你成為老大哥，你就有責任幫助一班年青人發展出佢哋最好表現。」作為老大哥，里奧表明會盡力幫助一班年青人...