雙「斯」齊賽前講「車」 精選

周日將會上演「車曼大戰」，依家車路士晌聯賽領先緊曼聯4分，依場6分波，如果一輸，就會將雙方差距拉到去7分，加上曼城現時多打一分領先3分，只要紅魔有咩失分，到時就真係追完一隊又一隊，所以周日場波都真係幾重要…正如兩老——傑斯同史高斯都要賽前高調講「車」呀…
傑斯同史高斯都要賽前高調講「車」...
傑斯：
傑斯就話喇：「車仔依家所有嘅除咗強勁陣容外，仲有就係累積到經驗，知道點樣去贏得聯賽冠軍。正常好似車仔咁樣加強咗個陣容之後，大家都會期待佢哋有實力贏得冠軍，依家加埋累積到嘅經驗，我相信佢哋可以戰鬥到最後一刻。」

「上年車路士前線有杜奧巴，中場有林柏特晌度舖路，令大家覺得車路士永遠都係一支實力強橫嘅球隊，當然今年都係一樣喇，佢哋加入咗夏薩特同奧斯卡，仲有同球隊更加融合嘅桑馬達，佢哋幾個都係好善於入楔，令球隊難以防守佢哋。」
夏薩特、奧斯卡、桑馬達令車仔中場強橫...
「有時新加入嘅球員好快融合到球隊，好似車路士一樣，佢哋今季開季開得好好，如果曼聯要贏波而回，一定要表現得好好先攞到3分。我都唔係好明點解一作客去到車路士會咁難攞到分，好似上年場波咁，我哋一早輸咗3球，之後連追3球，追成3-3，當時覺得我哋可以贏波而回，點知都係功虧一簣，我感覺近呢幾年曼聯晌車仔主場嘅表現唔差，只係攞唔到我哋想要嘅分數。」

史高斯：
「我哋今個禮拜將會有幾場大戰，要兩對車路士，之後周末又要對阿仙奴，近幾年我哋去到史丹福橋嘅比賽紀錄都唔係咁好，所以今場波絕對係一項大挑戰。我哋睇咗佢哋上個禮拜對熱刺場波，佢哋近幾年簽入咗好多唔同類型嘅高質素嘅球員，依家佢哋著重用一班細小同技術型球員，每個人都可以獨當一面，可以助攻亦可入波，令對手難以適應。佢哋絕對係一個好好嘅對手，大家都希望搶中場爭取多啲埋門機會，雙方對疊永遠都好有大戰氣氛，我哋好期待去改變近幾年晌史丹福橋嘅成績。」