蘇斯克查何去何從? 保頓? 布力般? 精選

噚日就同大家報導過，話安達臣就好驚無咗費SIR之後嘅曼聯唔知變成點，又話怕曼聯之後嘅得勝率會下降3至4成，諗深一層，都係睇下之後邊個接費SIR班，當然大家心目中嘅大熱刺都離唔開哥帥同摩連奴喇…之但係亦有球員作出其他選擇喎，佢就係球隊以前嘅「娃娃臉殺手」蘇斯克查…
蘇斯克查感覺樣子老了很多...
咁啱近日亦有關蘇斯克查嘅報導，話布力般同保頓都想簽佢，保頓名宿Alan Gowling日前仲出到聲話，球隊少咗奧雲高尼後，好希望球隊搵蘇斯克查返嚟…而早前蘇斯克查晌10月3日就澄清暫時未有布力般嘅人聯絡佢：「呢個傳聞嚟呀，現時為止我都無收過任何電話，所以我唔可以晌呢件事上面發表咩言論。」但據聞呢位39歲前曼聯球員，好希望返英格蘭球壇教波，佢仲特登星期一專程睇曼聯U21對修咸頓嘅賽事，唔知會唔會順道傾埋轉會喇…
有圖有證據...
蘇斯克查教嘅莫迪，啱啱晌歐霸盃賽事贏咗史特加2球，而晌聯賽方面，現時排晌聯賽第一位，以衛冕冠軍姿態出戰嘅佢哋，比賽咗25場，錄得16勝3和6負，以51排晌第一，領先第2名羅辛堡2分，執教能力的確有番啲功力…唔知佢如果佢真係加盟其中一隊，會唔會目標係累積英球壇執教經驗，之後嚟取代費SIR個位呢?
日後你會唔會就係費SIR接班人嘅真名天子???