費查：我等緊機會晌聯賽復出!!!

費查病咗咁耐，終於晌今季復出喇…雖然佢晌對克盧日以及對紐卡素嘅聯賽盃賽事都打足全場，但係數到去聯賽呢，咁就真係由上年11月後備入替對史雲斯之後，就再無上過陣喇，隔咁耐，唔怪之得費查開到聲話期待晌聯賽賽事中上陣…
費查希望盡快事隔11個月後，可以晌聯賽賽中復出...
費查就話喇，「對我嚟講，當然就係可以打幾多場波就打幾多場喇! 但我知費SIR手上有好多兵可以俾佢揀，特別係中場位置，絕對係好大競爭性，所以我知道自己要有耐性，要等待機會嘅來臨，希望呢個晌聯賽上陣嘅機會離不遠矣喇…依家我體能都OK，只係比賽狀態仲需要啲時間去操番起，例如晌場上反應，同埋位置感，當你個人年紀大咗，呢方面復原自己會比較慢。」
費查入選咗蘇格蘭大軍，正晌國家隊受訓...
其實除咗對克盧日以及對紐卡素嘅聯賽盃賽事打足全場，費查亦有晌U21嘅賽事入面亮相，唔知對佢復原以前狀態有無幫助? 佢就講喇，「有幾多場波可以打晒全場就打幾多場喇，咁耐無打過波，最重要就係可以出場，幸好歐聯、聯賽盃同預備組賽事都幫咗我好多。我極度渴望可以盡快打得起，對我嚟講，唔理係咩比賽，預備組、聯賽盃甚至蘇格蘭國家隊賽事又好，我晌場上嘅態度都係一樣，就係帶領球隊上正軌。」

費查要晌聯賽亮相，以後備上陣嘅話應該好快就等到，但要出任正選睇怕都有啲難度，事關暫時鑽石陣中，同佢打同位嘅卡域克打得好好，而卡華利亦加強咗信心，表現越嚟越好，相信費SIR會繼續重用，至於另外兩名中場——香川真司同朗尼，唔洗多講，當然係中場首、次選!!! 但仲未計埋史高斯、傑斯、安達臣…費查俾心機，先谷返起狀態先，再慢慢上陣幫曼聯贏返幾場波都未遲...