「小豆」：同新「2R」一齊合作，感覺好到難以置信 精選

曼聯現時晌英超踢咗6場波，4勝2敗，上場晌奧脫福對熱刺以2:3敗陣，如果今晚對紐卡素贏番波，都同榜首車路士有4分距離，今場場波如果再失分，到時拉開成6至7分嚟打，下半季都真係好辛苦先追到返嚟，所以今晚3分都咪話唔重要，尤其是晌國際賽前最好就以勝局作為小終結…正正查維亞靴南迪斯都係咁諗，今晚場波雖然難打，但目標係3分!!!
今晚對紐卡素目標：3分!!!
「小豆」講喇，「依家係時候專注番英超比賽喇，上場對熱刺無咗3分，但今場對紐卡素一啲都唔易打，我仲好記得佢哋上季晌主場表現好好，但球隊啱啱作客贏咗克盧日，大家都知歐聯賽事一啲都唔易打，尤其係作客比賽，贏波加強咗我哋信心，雖然今場波一定好難打，但球隊今周好勤力訓練，準備充足，將會充滿信心作客迎戰紐卡素。」
「小豆」好開心可以同尹佩斯、朗尼同時上陣...
上場波「小豆」同尹佩斯、朗尼同時上陣，雖然光芒被另外兩位前鋒攞晒，但「小豆」都謙虛話好開心可以同佢兩位一齊比賽，「其實我同邊個隊友合作比賽都咁開心，但第一次同尹佩斯同朗尼一齊合作，感覺的確難以置信，因為佢兩位都係世界級前鋒。球隊有咁多個高質素前鋒，上場波只係其中一個配搭，只要費SIR派咩人上陣，我哋都準備就緒。」

安達臣希望自己今晚有得上陣...
至於今年聯賽盃第三圈，曼聯正正亦都係對紐卡素，當時曼聯贏2:1，有份晌嗰場波入波嘅安達臣一方面當然想今晚正選，二來亦希望曼聯再次贏波，「我感覺自己100%晌狀態，已準備就緒隨時上陣，紐卡素有好多好球員，如果俾佢哋控住嗰波晌禁區外猜就會好危險，所以我哋今晚要時常控球在腳，盡量減少輸罰球同界外球，減低佢哋反擊嘅機會。」

喂! 迪迪仔，你估下 我哋今晚一齊落場打呀，定一齊坐晌後備呀???
有傳摩帥想要「小豆」，而曼聯又對卡卡注視咗好耐...因此以「小豆」作為交換籌碼???? 呢單嘢一定吹水居多....