里奧：無維迪，NO PROBLEM喇… 精選

維迪因為膝傷要休息8個星期，加埋菲爾鐘斯、史摩寧都傷，攪到中堅位得番里奧同伊雲斯兩個可以坐鎮，咁樣真係好大機會又要叫卡域克客串中堅，都咪話唔大鑊，但係里奧日前就話：「無維迪，NO PROBLEM喇…」
拍擋，你又傷呀?? 無事嘅，我幫你頂...

里奧就話喇，「後防咁多個球員都傷，呢個情況上年都試過喇，有咗上年嘅經驗，我估今年都可以適應過嚟嘅…唯一令人失望嘅係，球隊成日要晌後防換PARTNER，唔可以晌防線上建立穩定性，如何經常保持一致嘅拍擋上陣，大家建立到默契下，係球隊成功嘅基礎，但幸好依家都可以解決，伊雲斯對利物浦場波就代替維迪上陣，亦都打得好好，所以無問題。」
希望伊雲斯同里奧唔好再傷，幫幫手頂住維迪個位先...

之後佢又講到拉菲爾達施華，大家都知今年拉菲爾已經為曼聯入咗2個波，但其實拉菲爾成日上咗去攻，令到後防會有漏洞，可能需要中堅位幫佢填位，對此，里奧就講喇，「拉菲爾對自己要求好高，佢仲有時好情緒化，有時佢晌比賽知道自己做錯咗決定，佢會即刻彌補錯失。見到依家嘅拉菲爾，就諗返起自己以前，當我後生嘅時候，我都成日上去攻，寧願上去進攻多過打防守，但當佢有多啲經驗，佢就會先做好防守，到時佢就係一位頂級右閘。」
其實里奧同拉菲爾一樣咁激情，就算咁有經驗，里奧有時都會上前攻門...