曼聯專區小評：中場病入膏肓 精選

睇呢篇文前，先做個比較先：阿仙奴有卡蘇拿、戴亞比、阿迪達、藍斯、韋舒亞；車路士有奧斯卡、拉美利斯、林伯；曼城有托尼、巴利、洛維、拿斯尼、施華。曼聯呢？我哋有傑斯、史高斯、卡域克、安達臣，同卡華利。唔係話比落一定輸，不過一係就年紀太大，一係就太年輕，其餘兩個嘅級數又唔係真係好超班的情況之下，曼聯的中場可謂輸在起步點上。然而，一隊波前鋒再勁，後衛再硬，如果中場無法將兩者連繫上，咁就萬事俱休。所以，中場問題仍然係曼聯的最急切問題。
車仔的奧斯卡一鳴驚人唔睇品，拿斯尼真係幾好波

其實中場的失效已經令今季曼聯受過唔少苦頭，好似季初對富咸一役，中場迪比利(現已加盟熱刺)就令曼聯中場風聲鶴唳，雖然曼聯最後險勝3:2，不過已經突顯中場無以為繼的弱點。誠如史高斯所言：「曼聯一向都打兩個中場，好簡單，一個上咗去助攻，另一個就留返低防守，只此而已。我哋一直都係咁打…只係近年已經無再用呢個陣式。」回顧咁多年，曼聯一直都有一位鍾意打後啲嘅中場，表表者當然係硬漢堅尼，而恩斯、畢特都做到好多攔截，轉型的史高斯亦打得唔錯。依家打呢個位嘅係卡域克，傳送、連繫佢做得到，不過硬朗程度真係唔足夠。而包維、卡華利、安達臣等人更加講唔上「硬淨」，亦唔可以做到史高斯口中一個打前一個打後的配合。咁嘅中場，唔好話對住強隊的中場，就好似上仗對利物浦充滿活力嘅中場，都只會慘遭蹂躪，任前線有雲佩斯、香川真司、小豆、朗尼都好，只能眼望中場失波甩波。迪比利 vs 卡華利...真係唔夠撞架...

所以筆者認為，現時的曼聯既然無法買人，只可用有限人腳的情況之下，只有兩條路改善中場：一，講咗一千萬年的方案，要鐘斯改打中場，用其對抗性強的體能做攔截，唔好再放佢打右閘了。如果佢身處中場，攔截力唔會差得過迪奧堤、托尼等人。不過佢仍未痊癒，所以只有方案二可以用：先著力加強中場的默契，改打451陣式加強機動性及補位問題，以打多個人的方式加強中場，讓雲佩斯自己一人攻堅。當然中場有朗尼、香川、卡域克，加上左右的華倫西亞、楊格，應該可以分擔唔少工作。不過，前提係…韋碧克、蘭尼真係要好好秘密訓練一下先，有佢哋在場，中場再強都會甩波收場….鐘斯，等你好返喇！怕就怕你好返之後要替維迪...