曼聯專區小評：紅得有道理！ 精選

昨天的雙紅會，曼聯明顯不在狀態，而利物浦的戰意與組織都係開季以來最佳，如果單以此對碰紅魔實在難以取勝。所以最後曼聯的勝利，關鍵在於舒爾菲被紅牌逐出，紅軍10人應戰。不過好多人都認為球證判決太嚴，根本不應紅牌，而紅軍主帥羅渣士更將矛頭直指球證，認為曼聯都應該打少一人，伊雲斯雙腳飛鏟亦要紅。而比賽末段雲佩斯的「哂靴」與舒爾菲的犯規相近，亦有網民認為應領紅。然而，呢個係唔係事實呢？
曼聯專區編輯就重睇咗呢場比賽一次，試圖分析球證的判決。原來在舒爾菲領紅之前已經有多次的硬朗攔截，而球證已經先後2次與舒爾菲單獨談話，內容估計係警告舒爾菲落腳唔好再咁狠。所以，如果單睇舒爾菲領紅的攔截，在球證眼中應該只領黃牌(雲佩斯就因為咁領黃)，不過在事前球證已經多番警告之下，舒爾菲仍然唔收腳，反而變本加厲出腳更狠。所以呢個紅牌當然與舒爾菲的收山腳有關，不過亦與佢唔聽球證警告、情況已經失控有關。再加上事發時球證正正在舒爾菲的身後，見到佢連宵帶打，鏟完傑斯之後順勢從後侵犯埋伊雲斯，多種情況都告知球證舒爾菲已經臨近失控，球證當時判斷一個黃牌已經無法阻止舒爾菲的危險行為，出示紅牌亦是情理之中。如果大家要怪球證太嚴，又係唔係應該睇睇舒爾菲的魯莽呢？領紅後舒爾菲仲同爵爺衝突，不過賽後佢喺twitter上已經向爵爺道歉，亦向紅軍球迷道歉，話自己唔應該喺咁重要的賽事上咁魯莽。希望呢件事對舒爾菲而言係上咗一堂，令佢成為勇而不茅嘅球員啦！