香川真司：我只想身體健康~~

香川真司晌代表日本國家隊出戰世界盃亞洲區外圍賽時，因訓練時整親背傷，及後晌鬥伊拉克前一小時仍感到痛楚，雖接受咗治療，但最終都係被剔出大軍名單當中…

晌佢上機返英國嘅時候，佢接受傳媒訪問時就話要好好汲取今次嘅教訓，要好好學識點樣KEEP住自己身體健康，香川仔話喇，「今次背傷，相信應該係舟車勞頓所致，今次我會好好汲取教訓，日後記得要好好KEEP住身體健康。」唔講唔知，原來香川仔自06年踢大阪櫻花開始，都未試過受到背傷困擾。

準備搭飛機嘅香川...
另外，佢又講到自己踢英超有咩睇法，佢又話喇，「當我嚟到踢英超，發覺自己要加強好體能，先可以應付咁多場艱難比賽。」

講番周六對韋根一戰，雖然香川仔話自己背傷唔係好嚴重，但佢都想晌完全好番嘅情況下先落場：「嚟緊有多場硬仗，我會好好爭正選一席，但我都希望晌自己完全100%好番先落場比賽。」


而外國報導就話，曼聯對韋根一戰會有三將缺陣。雖然費SIR講到明會睇下香川真司同尹佩斯訓練時嘅表現，先決定周六會唔會派佢上陣，但傳媒認為費SIR唔會冒險派香川真司，以及拉傷大腿嘅尹佩斯，事關下周三有歐聯賽事舉行，所以相信怇兩個都會缺陣，而艾夫拿就因為代表法國對白俄羅斯時表現太差，費SIR決定俾佢休息，而會派新仔畢特拿上場。

香川真司同尹佩斯大有機會晌周六缺陣...