普巴首開腔：走因為我無正選打 精選

學阿爸話齋，後生時成日都因為唔夠耐性，火爆又急功，錯過咗好多嘢。而普巴好明顯對呢個道理一竅不通。19歲嘅前曼聯球員普巴過檔老婦人祖雲達斯之後首次開腔，講點解曼聯咁熱切要佢留隊都要走：

「我無後悔我嘅決定。喺曼聯我學到好多嘢，不過我感覺我一定要走。教練同領隊都信任我，不過佢哋唔俾正選我，話我太後生咁話，仲話假以時日我一定有機會。不過一直都無實現過！我嘅目標係踢波，你一直唔俾我上場，我一定會唔耐煩，係唔係？我唔明爵爺諗咩，點解叫我等下，我就係知我要踢波。依家我喺祖雲達斯就有正選位，我一定會成為世上最好嘅足球員。」
祝你前程似錦，普巴
2009年先到曼聯嘅普巴當年16歲，不過2011年就離隊，前後打咗好耐，真係好耐，足足2年。而一個16歲嘅小將，到18歲都未得到一隊上陣機會，就認為球隊對佢投閒置散，佢期望呢間世上首屈一指嘅大球會將一名18歲都未到嘅小將放係正選位置，呢個要求過唔過份呢？大家再睇睇另一位曼聯的未來新星湯卡華利，11歲已經入曼聯青訓，足足11個年頭之後終站穩正選之位，其耐心、能力、正面態度大家可見一斑。就連飛行里數都要時間儲啦，11年嘅默默努力，對比2年就要飛上枝頭嘅要求，大家仲會唔會記得呢位好高騖遠嘅球員？
呢個著紅魔青訓波衫嘅小朋友邊位？大家唔會唔識嘅！就係湯卡華利囉！