維素利係新曼聯右閘？？

維素利(Frederic Veseli)大家有無印象呢？佢已經加盟曼聯半年架喇！無錯，佢就係1月轉會市場時由曼城轉會嘅瑞士u17隊長喇！雖然佢加盟之後一直身在預備組加強體能同經驗，不過佢有隨隊去同阿瑪祖魯比賽，仲有出場添。不過打嘅位置唔係佢最擅長嘅中堅，而係右後衛噃：
當年今日
「可以同阿瑪祖魯比賽真係好開心，好多觀眾！而且可以同一隊一齊出場，真係令我好興奮架。我打開中堅嘅，不過我知道要勝任其他位置先可以幫到球隊，所以我都試下打右後衛啦。對我嚟講有啲唔係咁正常架呢個位置，不過我之前都打過呢個位，其實都可以嘅。當然，我可以再進步多啲啦！

係就係辛苦啲，特別係助攻時我都唔係咁慣，我要跑得更快先得。不過都係一個好經驗嚟嘅。當地球迷都好熱情，好似支持我哋仲多過本地球隊！」其實呢個都係試陣而已，右閘其實真係人滿之患架喇…拉菲爾、鍾斯、史摩寧都可以打，就連華倫西亞都可以打後一格，5個人爭一個位真係好玩咩…反之，左閘就淨係得艾夫拿，艾夫拿，艾夫拿同艾夫拿…費sir，做嘢喇！