日本人談香川成魔！ 精選

公布香川的轉會即將成事之後，曼聯官網採訪咗日本足球記者原田弘毅(Koki Harada)，佢認為香川將會成為新的曼聯傳奇，成就可媲美摩迪、拿斯尼！
原田弘毅咁講：「香川好特別，曼聯隊入面無人有佢嘅特色，創造力強、傳送準確，有啲似摩迪同拿斯尼。不過特別嘅係，佢入波比佢哋都多，位置上亦比較前，支援前鋒更多。我認為爵爺會打4321陣式，以進攻中場身份配合朗尼，支援前線的小豆或者韋碧克。
雖然好多日本球員打過英超，好似稻本潤一、宮市亮咁(其實中田英壽都算打過英超！以外借身份！)不過有球員打曼聯始終係好特別！所以當佢嘅加盟消息於英格蘭同日本瘋傳時，好多球迷都熱切等待！依家官方宣佈咗，好多日本人都好興奮架。你睇2010年佢加盟多蒙特後適應得好快好好，仲成為德甲兩連冠的功臣，我有信心佢喺英國都好快適應。佢英文唔好係一個小小的障礙，不過有朴智星幫佢，一定無問題嘅！(星仔打過日職聯，日文都ok架！)
星仔：師弟，放心！我照你！對日本球迷而言，老一輩日本人好多都係紅魔迷，新一代會喜歡地上最強巴塞多啲。不過依家情況一定唔同哂！我可以大膽講，好快東京就人人都著曼聯波衫，印哂香川真司個名！」其實點止東京，筆者都可以大膽講，香川加盟之後香港都會多咗好多人著紅色桌布…唔係，係曼聯波衫出街！