打奧足？無朗尼小豆份！ 精選

今個星期日就會係英超煞科戰，不過爵爺已經諗緊再之後嘅事，就係倫敦奧運！呢個係世界性嘅體育盛事，不過報效國家同米飯班主之間，都係老闆嘅威力大啲，2008年一單官司裁定，球會有權拒絕球員參與常規國際賽及友賽之外的國際賽，而偏偏奧運就係屬於呢種比賽。所以為咗球會，爵爺已經下達兩個關於奧運嘅命令：

第一就係唔准小豆出戰奧運！爵爺話第一季小豆打得好好，不過今季跌watt，原因係3年來佢都無抖過暑，年年為墨西哥南征北討所以打到腳軟，為咗小豆下季100%狀態出戰，爵爺就唔准佢小表墨西哥打奧運喇…所以，小豆可能無機會攞到奧運的獎牌喇…無得打奧足？？？
咁我返去練波囉...嗚...
而另一個命令就係除咗傑斯，無人可以以「高齡球員」身份參加奧運。事緣奧足的參加者唔可以大過23歲，不過就有3個「高齡球員」的走盞位。然而爵爺就一早聲明，唔可以有任何球員參加，即係里奧、朗尼、甚至係伊雲斯都唔可以報效國家喇。不過傑斯就唔同，因為佢咁大個仔…唔係，咁大個佬都無打過大型國際賽，爵爺就網開一面咁話。不過威爾斯揀唔揀佢又係另一個故仔喇！
揀我嘅話，我替你出陣！
咁係唔係紅魔一個都唔會喺奧運出場？咁又唔會，爵爺的「禁令」只在於23歲以上的球員同小豆，即係話卡華利、韋碧克、鍾斯、史摩寧都係可以參加奧運！所以英國國家隊出場時，大家又可以見下一眾曼聯球員喇！
你兩個就好啦！小豆好想打奧足架！