C朗好掛住紅魔呀！ 精選

好掛住！好懷念！遠走西甲嘅c朗拿度話佢好掛住曼聯的生活！佢接受訪問時，唔係講西班牙的生活，唔係講同皇馬隊友的關係，而係話當年！佢咁講：

「我仲有搵費爺傾計架，因為我真係好掛住曼徹斯特市嘅生活！對我而言，離開曼聯就好似小朋友離開屋企咁，雖然搵到自己嘅路，不過仍然有返屋企嘅衝動。無計，六年喇！我喺曼聯六年喇，真係好有感情架！我同爵爺、隊友好似一家人一樣，一齊成長，所以我哋仍然保持住好好嘅關係。好似蘭尼、里奧、安達臣、艾夫拿咁，我仲有聯絡佢哋架。」
唔覺唔覺原來c朗已經離開3年，當年2009年佢以8000萬鎊身價加盟銀河艦隊皇家馬德里，而他本人亦承認轉會皇馬是他的兒時夢想。轉投皇馬後之後，c朗的光芒更加耀眼，138場波入140球，真係好恐怖！而佢亦越打越前，已經由純粹的左右翼轉型，變成可以兼任前鋒。不過佢仍然好掛住曼聯，由曼聯訓練場附近嘅雪糕，到爵爺嘅超強感染力，佢都喺訪問時提到。
之後依靠你喇！
最後佢就咁講：「依家我好享受足球，亦認為我已經比年輕時優秀咗很多。不過我一定會記住職業生涯中最難忘嘅時刻，就係我同曼聯一齊贏得歐聯冠軍的時候，同我喺皇馬贏得第一個冠軍的時刻。」雖然係好掛住，不過我諗曼聯球迷同曼聯自己都唔會想帶佢返奧脫福喇，事關佢身價已經推到咁高，就算皇馬放行，曼聯都唔可能買得到；就算買到都會對曼聯的財政做成一大打擊。更何況，紅魔都唔會俾得起佢嘅天價人工…所以如果有一日c朗真係回歸奧脫福，佢一定付出好多放棄好多先得！你估會唔會有呢一日呢？
放心啦，師弟蘭尼做得幾好呀！