里奧打中超？？

唔係講笑！英傳媒報導，里奧費迪南真係收到中超offer，而且佢考慮緊去唔去！條款唔係要佢即刻轉會，而係等佢完咗紅魔嘅約先。如果佢真係接受，意味住11年紅魔生涯完結之餘，仲會令爵爺啟動留人計劃！

唔覺唔覺，里奧下年原來已經35歲，不過佢無諗過唔打英格蘭國家隊，而今年的歐國盃當然有佢份啦！不過年紀有返咁上下，總唔係人人能夠好似史高斯同傑斯咁可以打到38，所以外間認為里奧真係有機會接受中超的邀請，跟隨安歷卡等人去金磚國掘金！消息又指，向里奧招手嘅並唔係上海申花，不過就未有提到係邊隊，估計係俾得起好貴人工嘅貴州人和。
安歷卡可以話係開展中國掘金熱潮的球員！
爵爺對此都幾頭痛架：「費迪南已經成為更衣室入面最具影響力的人之一。我明白要佢留喺到唔係易事，不過只要佢留耐啲，對年青球員的正面影響就越多，咁樣先可以繼承更多魔血！」曼聯今季的30場賽事，里奧正選上陣21次，有背傷問題嘅佢其實已經盡力上陣，做埋因傷長抖嘅維迪的工作。唔知佢會唔會去中國踢波？呢個真係要拭目以待喇！
希望對布力般無驚無險啦！