韋拉又嘈:曼聯主場玩哂!

曼聯專區 於 29/03/2012 發表 收藏文章
唔知曼聯得罪咗韋拉咩,佢又出來批評曼聯,話主場的曼聯有能力左右球證判決,暗指上仗富咸沒有獲得12碼係球證驚咗曼聯!一開始記者問佢點睇富咸無12碼,韋拉首先係話唔想講咩批評曼聯,但係唔講又講,忍唔住又發炮:

「曼聯主場時佢哋有好多著數,其實對主場嘅曼聯、皇馬、巴塞或者米蘭都係,佢哋真係打多個人架!呢啲咪係『主場優勢』囉。無計架,傳統上佢哋成日贏,球證唔夠膽挑戰佢哋。所以我哋曼城都要成為長勝將軍,打響個名之後啲球證先會識驚,咁我哋先建立到自己嘅『主場優勢』!」聽完連費迪南都頂唔順,即係喺twitter到話:「夠喇!咩事啫?韋拉咁關心曼聯嘅?一星期兩次喇!」
咁關心我哋做咩?

有無必要咁針對曼聯呢?爵爺都認咗有問題啦!球場上球證唔係萬能,唔可能睇到哂所有的事件,其實曼城自己都有好多次俾球證走甩啦,好似對史篤城時巴利都喺禁區犯規、一月對熱刺時巴神巴洛迪利都有踩柏加,都係無判罰,唔通又係「打多個人」?

更重要嘅係呢一番說話犯咗3大錯誤,一方面得罪哂曼聯、皇馬、巴塞、米蘭;另一方面令曼城降格,鼓勵曼城逼球證黑哨;而且完全否定球證的公正性同專業。作為曼城的足球發展總監,講嘢唔幫曼城建立形象之餘,仲下下搞破壞令球隊cheap哂,其實曼城老闆係唔係好似文仙尼一樣,搵錯人返嚟幫手?
韋拉其實你想點?
標籤: 韋拉  曼聯  皇馬  巴塞  米蘭  費迪南  

留言


請按此登錄後留言。未成為會員? 立即註冊
    快捷鍵:←
    快捷鍵:→