費sir暴怒：曼城先係「發咗茅」！

依家英超兩頭馬車爭冠軍，仲要係同市嗰兩隊，真係點都要贏另一個對手…未講之後嗰9場打成點，依家雙方就先出口術…

依家係曼城足球發展總裁嘅韋拉，日前就話要37歲嘅史高斯復出，證明咗曼聯有缺點。「史高斯復出？即係曼聯蜀中無大將囉，史高斯都成37歲啦，仲要佢復出，即係無球員打得好啦？仲唔係發咗茅？睇怕未來幾年曼聯都係跌watt架喇。」佢仲話：「摩利臣啲咁有天賦嘅年青球員都留唔住，普巴又係咁，佢哋應該係時候擔心喇，你睇之前都無咩年青球員會離開曼聯，之後一定走更加多。」

韋拉日前公開討論曼聯事宜...
就係韋拉呢番話，激嬲咗費SIR，令佢罕有地大力評撃，反指「發咗茅」嘅係曼城而唔係曼聯。「我哋發咗茅？史高斯係近廿年英國球壇最有能力嘅中場之一，如果大家認為我帶佢返來係發咗茅，我認又點話？你又唔睇下曼城最近發生咩事？有個球員扭哂計唔肯上陣，領隊發晦氣話佢一世都唔會再有機會，而呢個球員喺阿根廷嘆咗5個月，打高球、嘆紅酒，文仙尼竟然都反口俾佢再為曼城出戰，如果史高斯復出係發咗茅，呢個球員復出仲唔係發哂茅係咩？」邊個球員？爵爺都唔開名，我哋專區都唔開名喇！大家知就算啦！
爵爺亦反擊韋拉指曼聯無法留住年青球員，佢話賣摩連遜係球會同佢嘅決定，係考慮過、對球會好嘅做法，並唔係要「梗硬賣」。而普巴方面，爵爺就乘機俾信心佢：「我哋想普巴留隊，因為佢將會成為一位出色嘅曼聯球員。如果佢留低，一定前途無可限量。」

筆者自己都覺得某啲人無必要發表咁惹火嘅言論，普巴仔，人哋叫你做新韋拉係叫你學人哋打好波，其他嘢？都係學下亨利、碧咸好啲！