費sir 文帥賽後對對碰 精選

相信尋晚一定係一眾紅魔迷最開心嘅一晚，最開心唔係曼聯以2-0贏咗西布朗，最開心莫過於曼城對史雲斯一戰中全失3分，依家以1分反壓「藍月亮」上榜首，終於暫度晌冠軍爭奪戰中佔到優勢…

賽後費sir就話喇：「都無諗過曼城會輸呀! 賽果對曼聯嚟講，係額外獎勵…我成日都同啲球員講，呢個時刻好容易失分，但重要係唔好失分俾你對手多…我哋依家得一個宗旨，就係繼續贏波落去!!!」

但輸咗波嘅文帥都好冷靜：「呢場輸波都唔關鍵，最關鍵係嚟緊嘅3個禮拜，個球季溜溜長，仲有大把時間，爭標形勢個個禮拜都唔同呀喇，依家我哋落後緊，只要球員繼續朝向目標，心理素質好啲就得，依家就係考驗球員心態嘅時間! 」
文帥嚟緊嘅賽程，一啲都唔易行，先後要對倫敦雙雄阿仙奴、車路士，又要對曼聯...

曼聯 與 曼城未來賽程：
　　　　　　　曼聯　　　　　曼城第29週　　狼隊(客)　　　　車路士(主)
第30週　　富咸(主)　　　　史篤城(客)
第31週　布力般流浪(客)　　新特蘭(主)
第32週　昆士柏流浪(主)　　阿仙奴(客)
第33週　　韋根(客)　　　　西布朗(主)
第34週　阿士東維拉(主)　　諾域治(客)
第35週　　愛華頓(主)　　　狼隊(客)
第36週　　曼城(客)　　　　曼聯(主)
第37週　　史雲斯(主)　　　紐卡素(客)
第38週　　新特蘭(客)　　　昆士柏流浪(主)

小總結：
唔計雙方對碰，論賽程，曼聯感覺失分空間比較細，事關曼城仲要對車路士同埋阿仙奴，而史篤城、紐卡素同新特蘭，相信都唔易應付…相反曼聯就對榜下游居多，比較具威脅，相信會係愛華頓同新特蘭，當然，尋日啱啱贏咗曼城嘅史雲斯都唔可以睇少!!!
費sir：咁就嚟返個榜首，史雲斯，好嘢!!! 俾幾下掌聲你...