聰明仔誓演「三獅雄心」！ 精選

聰明仔卡華利唔單止希望喺曼聯打得越來越好，佢更希望自己可以代表英格蘭上陣歐國盃同奧運！卡華利嘅潛質令佢今年大放光芒，不過因為傷患問題已經4個月無上陣，而且禍不單行，復出無耐又傷過。不過佢嘅傷比想像中輕，已經返到曼聯一隊跟操，雖然外間認為爵爺唔會急住要佢「再復出」，熱刺一仗應該唔會見到佢住喇！而佢出席奧運專用波”albert”嘅發佈會時，就接受咗個訪問，講到佢嘅國家隊雄心。
安達臣都同佢傾過奧足問題架！
「作為一個球員你會想打唔同嘅比賽，攞多啲經驗。我都有同安達臣傾過打奧足嘅問題，佢上次有代表巴西出賽，而且好享受過程，我都好想參與！有好多頂級足球員都會打奧足，如果可以見到佢哋，再攞埋金牌走感覺真係無得頂！」
三獅軍團要唔要卡華利呢？要fit先得噃！

要入選，卡華利真係要操返fit先得！佢傷咗一段日子，需要時間提升狀態，不過佢自己就有好信心，仲話計埋歐霸今年仲有20場比賽俾佢發揮，有足夠時間證明自己有力打國家隊咁話。不過有史高斯出山，佢擔唔擔心自己無機會出場呢？

「史高斯嘅復出真係好令人振興，仲幫我唔少。點解？因為我之前成日外借去其他球會，無咩機會同史高斯合作同練波。佢依家返來，我多咗好多機會學嘢！我最鍾意佢殺入娥眉月嘅必殺射波，有佢教我，我會試下將呢招融入自己嘅打法入面！佢啦，傑斯同碧咸都係好好嘅榜樣，我會好好學習！好似史高斯，唔止佢嘅中程射波，佢嘅長短棍交波我都好想學，而傑斯嘅足球意識亦對我好有啟發作用！」咁虛心，抵一班球迷咁鍾意你嘅！有兩老教路噃，不過聰明仔想用威爾斯國家隊打法定英格蘭國家隊打法呢？不如用齊啦！
http://www.youtube.com/watch?v=ix92AUoPbJk不過要學的話，呢招一定要有啦！