曼聯歐霸20人出陣！瀟灑哥無份？ 精選

今晚曼聯將會出戰球會歷史上首仗歐霸賽事，飛到阿姆斯特丹對戰阿積士。而有幾位球員將唔會出現喺20人大軍入面，令人出乎意料嘅係其中一人係瀟灑哥貝碧托夫！

瀟灑哥呢兩年喺英超聯已經無咗正選位置，外界都認為爵爺會喺盃賽用佢，點知最後打歐霸都係唔見影，唔知係傷定係點呢？可能要晏啲開記招先知點解喇！而同時無份打嘅亦包括老黃忠傑斯同艾夫拿。對傑斯而言，下一場波係好重要，因為係傑斯為曼聯上陣第900次的大日子！不過上仗打足90分鐘，要佢再長征阿積士真係有困難，所以900次上陣的日子就再遲啲啲先啦！瀟灑哥：今次波波都無得吹添...
傑斯：唔好慌！我哋去飲杯嘢喇！
而艾夫拿上星期經歷咗好特別嘅一周，爵爺咁講：「我哋想佢抖抖，上星期對佢而言情緒波動好大，佢係時候乖乖哋留係屋企。上星期佢諗嘢太多了。我好高興大家都談論返賽果，我哋有時贏利記，有時輸俾佢哋，不過有樣嘢係一定嘅，我哋都需要對方(吓???)。」
跳返part舞先~
咁多事發生，艾夫拿好好休息下啦！唔好諗嘢喇！
不過隨隊嘅成員入面，有好多都係令人鼓舞嘅，當中梗係包括千呼萬喚始出來嘅基華利啦！而楊格、鍾斯亦有隨隊，年青球員方面就有普巴、費阿斯，仲有…小豆！佢對自己表現好有期望：「我有啲失望，因為今季我都傷得幾多…不過有啲嘢自己控制唔到嘅，依家我狀況幾好，亦都好開心有機會打歐霸。曼聯同阿積士都有好長嘅歷史，而且都攞過好多歐洲賽的冠軍，所以呢場比賽都會好有睇頭！」
朗尼：唔駛求喇，今仗你出！
睇完20人名單，筆者反而因為一個人嘅名而興奮，就係普巴喇！佢係其中一個曼聯的神奇小子，不過一直唔肯續約，爵爺亦好似想放棄佢咁…不過最近嘅賽事普巴出場多咗，後備席亦見佢多咗，表示佢同球會的關係越來越好！最好梗係季尾前可以續到約啦，見住離隊後獨當一面嘅碧基、羅斯仔，真係唔想再多個普巴喇…
其實普巴可能就係曼聯中場欠缺嘅砌圖：硬漢形防中！