爵爺：基華利一個月內可以歸隊！

中場問題困擾曼聯好一段時間，而其中一個不假外求的出色球員莫過於基華利。佢今季開始漸露頭角，打得出色之餘仲令球迷印象深刻，不過自十月廿九號足踝關節韌帶受傷之後，佢嘅傷一直反復，而曼聯嘅中場線亦變得人腳唔齊。爵爺最近就講起佢：

「基華利雖然仲未完全康復，要佢返一隊仍是言之過早。不過佢好努力咁訓練緊自己，練好多跑。佢嘅回歸一定會令曼聯變得好可怕，因為我認為佢係一個好特別嘅球員。」

提到各傷兵嘅情況，佢就咁講：「我期望楊格可以喺週中復操，應該好快可以返回賽場。而基華利，我期望2星期後佢可以復操，而安達臣就有望今個星期復出。安達臣會於星期一、二同一隊一同操練，加埋佢我就有好多中場兵源可供選擇。
中場傷兵逐漸傷癒，點兵方面我開始會有多啲選擇。好似表現越來越好嘅卡域克，仲有傑斯、史高斯、基華利同安達臣，佢哋每一個都可以喺曼聯中場獨當一面，之後發生咩狀況都有佢哋頂住！」
你哋幾時先好返呀？大家好掛住你哋！
咁講法，即係基華利好快就會返到曼聯一隊喇！轉會市場仲有兩日就關閉，睇嚟引入新血嘅可能性已經不大，如果有聰明仔返隊，對紅魔一定有莫大幫助！加油呀，大家等緊你架！