曼聯專區小評:歐聯出局曼聯學到的4件事

曼聯專區 於 15/12/2011 發表 收藏文章
第一次打歐霸,對於曼聯而言確是一個令人不開心的事。不過呢一個現實嘅背後,俾咗好多訊息爵爺,唔知佢收唔收到?曼聯專區就歸納咗4點曼聯應該要學懂的事情,你心目中又有無相同諗法?

第一:經驗真係好重要?雖然曼聯仍然有維迪、里奧、傑斯、卡域克等經驗老到的大將,不過英國Telegraph就認為雲達沙、史高斯同加利仔嘅退役對曼聯有想像唔到嘅影響。特別是維迪、里奧受傷時,就更顯問題。
呢一個點筆者其實不太認同,因為史高斯、加利仔在隊中的重要性其實已經一直下降,出陣的次數亦不多。鐘斯、史摩寧的出色發揮其實可以代替他們。要數影響,反而雲達沙的離開是大問題,但事實證明迪基亞同連尼加特交足貨有餘。真正的問題,其實是歐洲賽要求更強大的中場,星仔、卡域克的能力其實在歐賽都是比較邊緣,他們有狀態就可以幫到曼聯,但發揮唔到時其實好易比一眾歐洲球星壓制住。
佢兩個好重要...不過成日傷...
佢兩個擔大旗?仲可以!

第二:要馬兒好,當然要俾草!爵爺希望以一眾新力軍做曼聯的支柱,培育一班「根正苗紅」的紅魔,雖然有一定成效,基華利、韋碧克、小豆等等亦打出了一定的身價,不過尚未稱得上能擔大旗。失去咗C朗拿度、泰維斯,爵爺在轉會市場步步為營,不過就令佢錯過買入大衛韋拿、拿斯尼、史奈達等舉足輕重球員的黃金機會。依家要買入有能力的球員,人地叫價只會更高。咁曼聯可以點?不惜成本買?定係仍然就住就住,買啲二線球員就算?不過最大可能,就係咩人都唔買…如果以咁嘅中場,點係歐洲球壇站得穩腳呢?
唉...早啲入貨就唔駛咁貴啦!
今年星仔聯賽都無咩上陣機會...

第三:朗尼唔係one man bank。每隊歐洲豪強都有一個核心人物,好似巴塞嘅美斯,皇馬嘅C朗,曼城嘅阿古路咁。不過,曼聯嘅核心雖然係朗尼,不過佢嘅打法非常團隊,唔似上面幾位人兄咁自己可以扭埋入網。佢好需要人幫手先可以打出效果,好似佢啲毒到無倫嘅斜線傳送,如果無咗小豆、蘭尼佢地接應,就唔能夠成為入波。又或者,有蘭尼同楊格毒到無倫嘅斜線傳送,朗尼先入到波。所以佢打得好唔好,有時都幾睇隊友發揮成點。好似小豆傷咗、蘭尼啞火,朗尼自自然然就打得窩可…所以,佢真係要有人幫!
大家生生性性!佢就打得好架喇!

第四:唔好睇小你嘅對手。曼聯上季可能打得太順,一球不失就打入歐聯決賽,令爵爺鬆懈咗,今年初段的比賽都派遣半力出陣。最後曼聯在歐聯C組只取得2勝3和1敗的劣績飲恨出局,而勝出的2場都是對弱旅加拉治。巴素利和賓菲加的實力確是不如巴塞皇馬,但既然可以立足歐洲賽場,是否應該派遣伊雲斯、史摩寧做正選中堅(首場對賓菲加)?如果一早以強陣取得出線資格,才給與機會新將出陣歐戰戰場是否更好?

無論如何,出局已經成為事實,而上天的安排之下,同市宿敵曼城亦被淘汰到歐霸盃,這個小水池好可能成為兩大蛟龍困獸鬥的戰場。到時是紅魔報一戰之仇,定係曼城再勝一仗,就好睇爵爺點樣調整返隊波了。不過都幾肯定,再係咁硬米煮硬飯,曼聯再敗一仗的機會絕對唔細…爵爺,唔好再堅持喇!買人啦!
呢句...不如贏咗曼城再講?形勢不妙呀

來源:曼聯專區

標籤: 歐聯出局  曼聯  

留言


請按此登錄後留言。未成為會員? 立即註冊
    快捷鍵:←
    快捷鍵:→