紅魔中場又少一人 費查因潰瘍性結腸炎將長期缺陣

曼聯專區 於 14/12/2011 發表 收藏文章
曼聯中場中呢個位,真係買少見少,就連最佳位置打中堅嘅菲爾鐘斯,都要推上前打中場…依家球隊又有壞消息:繼安達臣、基華利都要休息到明年先復出後,曼聯又失一位中場大將,呢個就係費查,球會仲話佢會長時間缺陣…

曼聯官網宣佈,費查因受到潰瘍性結腸炎影響,將長期缺陣,以協助他遠離傳聞同壓力,得以能夠幫助費查康復。其實早在上季,費查就飽受被潰瘍性結腸炎折磨,因而缺陣咗兩個幾月,當時曼聯為咗尊重佢嘅私隱,只係對外公開佢係病毒感染。

上季費查缺席兩個月後,曾經短暫復出,但其實落場機會唔多,當時球迷只係見到佢瘦咗好多,加上佢09/10球季有好表現,所以當時大家都希望佢復出打番正選…只可惜費sir話佢未夠狀態,到呢一刻先知原來嗰時嘅佢,仍然受病痛折磨…亦因為咁,佢今夏都無參加訓練,到曼聯作客賓菲加一場波,佢先正選上陣,因為當時佢病情有所緩解,但早前佢堅持為曼聯和蘇格蘭上陣,令佢病情又加重…

到依家,佢接受醫生的建議,遠離高強度的訓練同比賽,專心養病,希望可以完全康復。晌度筆者代表各位曼聯迷,祝福費查快d完全好番,再披上紅魔戰衣…

基華利對費查缺陣好難過

基華利對費查缺陣好難過,佢表示:「費查一直係我一個好尊敬嘅人,畢竟佢由青年軍升為一隊主力的路,就係我依家走緊嘅路,所以我聽到佢缺陣,為佢感到難過,依家佢嘅病情仲係反反覆覆,我怕對佢同球會嚟講,都係壞消息。費查對曼聯嚟講,真係好重要,因今年多位中場多傷病,不過球隊仲有傑斯、朴智星、卡域克、菲爾鐘斯同吉遜等球員可用,應該可以應付呢個困難。」

小知識:何謂潰瘍性結腸炎?

潰瘍性結腸炎是慢性非特異性潰瘍性結腸炎的簡稱,為一種原因未明的直腸和結腸慢性炎性疾病,主要影響結腸及直腸的粘膜層。其臨床病徵是間歇性腹瀉、粘液膿血便、腹痛。病情輕重不等,但多反復發作,影響結腸及直腸,當炎症持續,甚至有機會演變為癌症 。止此病可發生於任何年齡,但發病高峰期分別是 20 至 30 歲的壯年,以及 60 至 70 歲的老年。男女發病率無明顯差別。精神刺激、勞累、飲食失調是此病發病的誘因,不過其成因至今未明,患者的腸道在無明顯原因下慢性發炎和潰瘍,有專家估計與遺傳及環境因素有關。

留言


請按此登錄後留言。未成為會員? 立即註冊
    快捷鍵:←
    快捷鍵:→