鏡報：雙紅會由費查領軍？

剛剛打完國際賽嘅費查，大家都估佢會抖下先，對紅軍唔會出住，不過鏡報就唔係咁睇！

睇返一個唔係好開心嘅數字，就係對上三次曼聯作客利物浦都係輸波…不過同時，呢幾場比賽中費查一次都無出過場！而鏡報就認為，費查嘅攔截能力同鬥心將會係作客擊敗利物浦嘅一個必要原素，所以明晚嘅比賽將會以費查領軍！

提到聽日嘅比賽，爵爺就咁講：「我地次次去晏菲路都打得唔好，紀錄都幾差下…其實都幾失望，每次作客時我哋都好似被當地嘅氣氛影響咗，表現打咗折扣。其實次次我地都如臨大敵，當正世紀之戰咁打，不過我地有必要做得更好，有必要令球隊打出水準，先有機會擊敗紅軍，一雪前恥。」
而鏡報亦表示，聰明仔基華利已經傷癒，有機會搭檔費查鎮守中場線，而安達臣同卡域克亦在候命之列。而季初傷出嘅鐵衛維迪亦已在周二的國際賽亮相，明日應該有機會出陣加固防守能力。

既然人腳開始齊返，希望可以擊敗紅軍大振軍心啦！大家準備好聽晚睇波未呀？

來源：鏡報
靠你喇！查哥！你出返嚟就好喇！一來你已經唔驚佢，二來佢都唔喺紅軍啦！
基華利出返場，相信好多紅魔粉絲都好開心！