朗尼談「紅鋒」：由卜比查爾頓講起！

唔知大家有無打機呢？話說最近有隻新足球遊戲上市，朗尼出席記者會時就談起紅魔的一眾前鋒！而第一個傾到嘅，竟然係卜比查爾頓 ( 卜比sir )？？

卜比sir當年咁勁，朗尼當然要甘拜下風...

要比，當然係比入波！卜比sir係曼聯入咗總共249球，而朗尼呢？都已經入咗156球，係球會嘅第8位！以25歲嘅球員而言，都咪話唔恐怖！不過提到卜比sir，朗尼都無辦法唔心服：「佢入嘅波都好靚，我有佢一半已經好開心！不過更令人心折嘅係佢嘅人品同態度，好似紅魔出去比賽咁，唔單止場場波都見到卜比sir，就算上飛機去其他地方比賽又見到佢，落飛機又見到佢，每場比賽之後喺更衣室都會見到佢！而且佢唔係一碌木咁企喺到，佢真係會俾意見大家，我好聽佢話架！」

有「小豆」，朗尼就打後...

「講返依家嘅組合，我感覺個個前鋒都好好！好似小豆，佢鐘意打得好前，而且突然入楔的速度好快，時機亦都好好，幫我拉空咗唔少空位，所以拍佢我就會打後啲，做連繫中前場的工作。而奧雲呢，佢都打得好前，而且走位同最後一腳都處理得好好，最勁嘅係佢對住世界級後衛都可以好冷靜，係我應該學習的。」

奧雲就埋門夠晒冷靜....

「拍住瀟灑哥就唔同啲，佢打得幾後，鐘意溜後攞波，所以意味住我拍佢要打前啲做接應。拍住韋碧克呢？就睇邊個近啲個龍啦！我地打法都係前又得後又得，只要一個做主攻一個擾亂，就足夠打散對方防線！」

「瀟灑哥」??? 佢咁鐘意後上攞波，朗尼當然打前喇...

傾到依家曼聯攻勢比起前幾年好似更銳利，佢就咁諗：「我感覺我哋係巴塞身上學到好多嘢，特別係攻勢方面。佢地交波準同技術好就人盡皆知，不過我自己就認為佢哋強嘅原因係防守極快速，佢地攻擊時、係對方半場失去控球權時就會全軍進行攔截，好快就可以搶返個波，再次發動攻勢。我感覺呢個先係巴塞強悍的主要原因。」

「我哋感覺呢個模式好好，已經慢慢喺隊伍入面試用緊，季初的戰績亦反映出唔錯嘅果效。當然，都要有呢一班有氣有力嘅新魔兵先可以做到咁體力化嘅戰略啦！」

韋碧克同朗尼除咗搶位外，場上都鬥...鬥咩?? 咁就係鬥快門前搶位囉...

原來係以夷制夷！唔怪曼聯季初攻力鋒銳咗咁多啦！不過喺爵爺帶領之下，一定唔止搬字過紙咁簡單嘅，當佢捉到新兵們的特質，可能會試更多新陣式同戰略呢！


來源：英國太陽報

http://www.thesun.co.uk/sol/homepage/sport/football/3847222/Wayne-Rooney-Manchester-United-are-copying-Barcelona.html