菲臘鐘斯:無咗里奧維迪,仲有我!

曼聯專區 於 19/08/2011 發表 收藏文章
大家都知里奧要傷6個星期,維迪亦喺對陣西布朗嘅時候傷出,爵爺無咗兩員大將,選擇就得返菲臘鐘斯、史摩寧同伊雲斯了。點樣做配對好啲呢?我諗大家心中都有一個理想陣容,就係英格蘭U21的小國腳配搭,菲臘鐘斯配史摩寧喇!


鐘斯自己都對呢個組合信心十足,佢話:「我同史摩寧好夾架,U21出我地兩個時,英格蘭好多時都無失波!無他嘅,我哋默契好好架!夾咗咁耐,溝通唔成問題,而且我哋可以互相閱讀到對方的比賽節奏,咁對後防的穩定性起咗好大作用。」

菲臘鐘斯的理想拍擋:史摩寧...但係今年費sir好似想train史摩寧做右翼呵...


而兩位老大哥當然亦會傾囊相授啦,同佢地一齊訓練嘅鐘斯表示自己獲益良多:「里奧同維迪係好偉大嘅後衛,我成日睇佢哋啲片學嘢架!依家有機會一齊train 噃,梗係要好好學嘢啦!」


依家曼聯人腳其實已經定得七七八八,大家都可以預計到鐘斯同史摩寧係里奧同維迪的接班人。一開始大家都會估,可能都係對啲弱旅時先慢慢俾佢地出戰,不過依家就唔駛喇!下仗對強隊熱刺已經好可能係呢對年青鐵衛擔大旗!呢個絕對係一個急速成長的好機會呀!加油呀!

被喻為未來希望嘅鐘斯,今季好大機會同另一新兵艾殊利楊格一樣,晌重要賽事入面為曼聯上陣~~


來源:英國太陽報
標籤: 曼聯  菲臘鍾斯  史摩寧  

留言


請按此登錄後留言。未成為會員? 立即註冊
    快捷鍵:←
    快捷鍵:→