瀟灑哥：離開曼聯我仲可以去邊？

上屆歐聯決賽，瀟灑哥貝碧托夫被爵爺摒棄於後備席之外，寧用奧雲，外間一致認為這位英超金靴獎得主會難以接受，並在今夏離隊。不過事情並非如此發展，瀟灑哥留隊之餘更首度開腔，為留效曼聯的原因解話！

其實原因都唔難估到，就係榮耀！佢咁講：「離開曼聯我可以去邊？曼聯係世上最強的隊伍，離開的話我只能去低一級的球隊。這一刻我不會想去另外的地方，因為無論去邊於我而言都係一種退步。直至現在，我的事業都只係向上，向上，再向上。都已經係最好的球隊入面，我見唔到原因要去差過曼聯的球隊打比賽。」
貝碧：我唔留晌曼聯，仲可以去邊呀...


對於呢位上屆入20球成為英超神射手的曼聯前鋒而言，堅持風格重要過一切。好多球迷都形容佢為「懶懶閒」，不過佢自己就認為堅持風格先最能夠發揮自己長處。「上一季證明到只要堅信咩先係最適合自己，就一定可以做得好。你唔會見到我周圍撲波，因為我家鄉保加利亞有一句說話：『高質素唔一定要用盡力』我一直都當呢句係座右銘，而我之所以能夠有今日嘅成就都係因為跟足佢嚟做。所以我係唔會改變我嘅風格。」
「我係一個好自豪的人，唔鍾意係人前表露自己的弱點。因為咁我唔會係傳媒前表現自己的情感，所以有好多傳媒都誤解咗我。不過，無所謂！我唔介意。」

撲波? 我家鄉話：No way...因為唔係識得撲波就叫做好波...


筆者其實都好高興瀟灑哥留隊，更加讚賞佢咁信任曼聯的強大。不過，佢呢一種堅持、一定要踢瀟灑波的諗法，可能真係唔多得紅魔迷的歡心，始終係呢到最討喜的球員都係左撲右撲型，好似依家的朗尼、星仔，前少少的迪維斯，仲有其他打不死的紅魔好似堅尼咁，都係會撲至最後一刻的「爛打型」球員，而且一眾曼迷對佢地的評價都好高。咁瀟灑哥你其實係唔係都應該跑多兩步，「盡力」啲啲換取高質素呢？


來源：衛報