曼聯專區小評:最後角力!史奈達爭奪戰接近尾聲!

曼聯專區 於 15/07/2011 發表 收藏文章
最近曼聯的轉會傳聞只有一宗,亦可能是最後、最關鍵的一宗:橙色核心史奈達!不同新聞報導的都不盡相同,有太陽報言之鑿鑿交易已經完成;又有爵爺親身說法,話唔買史奈達;今日又傳為了帶史奈達去奧脫福,曼聯總裁基爾親顧草蘆,率領曼聯代表團到米蘭洽談史奈達轉會事宜;其後又話基爾其實係去慕尼黑開會,唔係去米蘭…最後,都係得一個消息,就係仲未有消息。

其實經過咁耐的轉會追蹤,筆者感覺到史奈達爭奪戰已經到達尾聲,因為各個持份者的利益都已經昭然若揭:一,曼聯本身當然好想得到史奈達,就連格拉沙家族其實都已經開哂綠燈,只要可以重組新紅魔,出多啲轉會費,甚至要基爾出面都唔怕。而各大報章其實都公開咗轉會費的不能說的秘密,3500萬英鎊其實曼聯唔怕俾,而國米亦好肯收。所以問題就係第二位持份者身上,即係爵爺喇。佢唔係唔想要史奈達,但佢要求的人工實在太貴,唔係怕俾唔起,而係怕開壞咗個頭,接受咗咁高人工的叫價之後,一定人人都要求加人工,到時爵爺真係唔要份糧都唔掂。如果可以突破呢個缺口,史奈達來投應該不遠了。

而剩返的兩個持份者其實已經表哂態,國米口頭上就硬,話唔賣唔賣,但又留條尾話:如果有人出高價我地都會諗諗佢嘅(7月21日 ESPN Soccernet新聞);史奈達就更明顯,同人地講:國米賣我去邊我就去邊啦!其實成件事已經有full picture,就係人工傾唔掂!而呢個時刻我地只能等其中一方讓步,一係就史奈達接受較低的人工加盟,一係就爵爺同曼聯豁出去俾天價人工換來新核一粒。既然都行到呢一步,史奈達爭奪戰應該已經進入最後階段了!各位曼迷,應該等多一陣就有結果喇!

由曼聯專區編輯撰寫
我要呢個價
收咁高人工,打跛腳都唔休啦!嘻嘻!
所以話,無呢個價我唔制ga!
爵爺:哇...你係唔係獅子座ga?好似獅子咁大個口嘅??
標籤: 曼聯專區小評  史奈達  

留言


請按此登錄後留言。未成為會員? 立即註冊
    快捷鍵:←
    快捷鍵:→