傳完又傳? 曼聯又買新仔？？費爵爺睇中法甲小將！(+ video)

啱啱先買完個年青兼通天老倌菲爾鐘斯，依家費sir又諗住買新仔，仲要又係後衛? 無睇錯喇，又有報導指佢睇中咗個法國小將 -朗斯嘅新仔華拉尼(Raphaël Varane)…其實好耐之前已經傳費sir對佢有興趣 (舊聞可參考 http://www.livdig.com/manutd/c1044153.htmlt)，當時仲傳爵爺同雲加好投緣，同時睇中華拉尼(Raphaël Varane)！

雖然今年朗斯要降班，不過呢位小將就晌已經打出名堂！18歲嘅華拉尼，就成為朗斯正選後衛，並且入選了法國U21國家隊。華拉尼可以司職中場同中堅，制空力高、身材亦好煞食，有6尺3寸咁高，而朗斯的青年軍教練Eric Assadourian形容佢做「真正一流嘅球員」，有速度、強壯，抗禦力高，有一流防守球員的潛質咁話，而報導傳出，曼聯已經出價10.5萬歐元，勢要買佢返嚟…18歲就已經入選代表法國U21出戰…

佢晌朗斯打開中堅，但中堅咁多人，有不可或缺嘅維迪、里奧費迪南，年輕嘅又有史摩寧、莊尼伊雲斯同埋新兵菲爾鐘斯，之後仲有布朗、奧沙等客串，曼聯究竟洗唔洗咁多中堅呀? 如果爵爺真係簽佢返嚟，我諗都應該搵佢打中堅多啲，事關里奧上一年成日傷，布朗感覺今夏好大機會會買佢走，至於單靠史摩寧同伊雲斯，好似唔係好穩陣，而新簽嘅菲爾鐘斯，相信費sir會搵佢頂加利仔個位，所以睇嚟佢係想搵多個後生仔培訓下。不過佢可以打埋防中，又真係咁吸引，起碼多一個選擇！但其實曼聯仲有選擇的，同樣都係可以打中堅同防中嘅洛維之前入魔傳聞都係甚囂塵上，唔知又係唔係爵爺計劃之一呢？http://www.youtube.com/watch?v=xon9uL-MNHM
其實華拉尼唔一定去紅魔呀，因為仲有曼城、巴黎聖日爾門同埋里昂一齊爭，同時華拉尼自己都講到明要轉會去一間有得打正選嘅球會，如果嚟到曼聯，打正選嘅機會又真係細咗少少，但爵爺之前就有話過，去英國熟習下英超節奏先，對華拉尼來說無壞咁話！真係咁想簽嘅話，咁今次係唔係要出動費sir本人親自出馬游說?

後記：筆者自己就覺得買呢個新仔都幾冒險，一方面曼聯的後防其實人都唔少，史摩寧同菲爾鐘斯固然討喜，而伊雲斯雖然偶然遊下魂，不過都係有一定潛質。依家又要俾成1千萬英鎊買一個防守球員，點解唔留啲錢加固中場線呢？大家都知曼聯依家就係無一個中場大腦，你話要買楊格打左路我理解，要買摩迪加強創造力我都理解，但買一個防守球員呢？就好似唔係當務之急勒。加上如果佢同洛維，我會揀洛維喇，事關起碼打過兩、三年英超，一買返嚟可以即刻用到，唔洗又要等時間去等佢適應…作為曼迷你又點睇？
來源：衛報 及goal.com華拉尼同洛維，兩個都傳咗咁耐，你又中意邊個多啲呢？