浴火重生:華倫西亞(+對史浩克入球影片)

曼聯專區 於 06/06/2011 發表 收藏文章
衛報訪問了因為腳部重創,休養逾大半年後復出的華倫西亞。原來呢位厄瓜多爾球員曾經陷入好深嘅恐懼,怕自己從此唔可以再在綠茵場上馳騁。而係曼聯嘅團隊之中亦曾經有過最壊打算,恐怕華倫西亞會受到永久嘅影響。情況就好似艾倫史密夫一樣,2006年佢都係受咗類似嘅傷(被當年的利物浦懷斯射斷腳…),之後即使好返,史密夫都話自己已經唔係以前嘅佢,更加唔好講以速度為本錢嘅華倫西亞。不過佢嘅極速回歸,仲有好好的表現,鳳凰之名實在當之無愧。

其實佢真係唔想回想當時受傷嘅情況,痛嘅唔止係佢隻腳,最痛嘅係心,因為成個受傷過程佢個女、四歲嘅Domenica都睇到哂…作為一個爸爸,真係唔想個女見到咁恐怖嘅一幕。見到一個球員傷成咁,仲要係自己嘅爸爸,真係好難想像Domenica點諗。所以華倫西亞即使當時吸緊氧氣,忍受緊好大嘅痛楚,不過仍然盡力舉起隻手:唔係答謝球迷支持咁簡單,仲係要俾個女睇到佢紋咗Domenica名字嘅手臂,同個女表示,爸爸無事,我一定會好返。紋咗Domenica名字嘅右手!妳爸爸無事勒!

佢嘅承諾完全做到,即使佢嘅傷真係好嚴重:斷骨、足踝關節脫臼、韌帶斷裂,但大半年後佢連蘭尼嘅正選位都搶返,真係令人好震驚。佢自己都話:「我無諗過可以好得咁快,應該係話我甚至有諗過我嘅球員生涯就咁玩完,真係好擔心。受咁重嘅傷,你會開始諗有咩其他球員都係咁,好返之後又有幾多個真正可以回到受傷之前的水平。不過隊內牧師同費格遜俾咗好多鼓勵同支持我,令我有返信心。」

而令佢咁快好返,唔單止有好多人支持,仲有好先進嘅科技。你估下佢用咩工具做治療?竟然係美國太空總署一個模擬零重力嘅跑步機!原本呢舊嘢係俾太空人練習點係低重力嘅月球漫步,依家就俾華倫西亞用來重建腳部肌肉!個果效仲好神奇,可以俾肌肉好好鍛鍊強度之餘,完全唔加重腳部嘅重量同負擔(其實…筆者都幻想唔到真實情況係點…)用咗呢個機3個月,平時游下水、做下GYM,華倫西亞開始慢慢痊癒、回復。

當然一開始打返波,佢都係好驚驚青青,怕又傷過,不過佢開始為自己未盡力去做攔截而自責,而呢種全力以赴嘅正確球員態度令佢好快忘記傷患。當然望住自己嘅隊友咁努力,再加上腎上腺素入腦,亦令佢好快變返以前嘅華倫西亞。今日,佢幾乎打哂所有嘅紅魔大型比賽,甚至係對巴塞嘅歐洲頂峰之戰都有出戰,實在令人瞠目。唔怪得朗尼講過佢真係好想華倫西亞同佢一齊作戰,因為呢隻鳳凰真係唔係人咁品!

現在紅魔進入新一頁,我地都期待住有新的球員加入,不過筆者就好期待華倫西亞的進步同成熟!對史浩克佢有入波tim~http://www.youtube.com/watch?v=r2MwSFZob8A我地來重溫一下佢對史浩克次回合的入波!留意呀,佢入咗波之後都有show右手!呢球係送俾Domenica嘅!
標籤: 華倫西亞  

留言


請按此登錄後留言。未成為會員? 立即註冊
    快捷鍵:←
    快捷鍵:→